बीड : बीड जिल्ह्यातील गेवराई तालुक्यातील लुखामसला येथील जिल्हा परिषद प्राथमिक शाळेत चौथीत शिकणाऱ्या चार विद्यार्थिनींसोबत शिक्षकाने गैरवर्तन केल्याचा गंभीर प्रकार समोर आला आहे. संबंधित शिक्षकाने मुलींसमोर कपडे काढून नाचणे आणि त्यांना चुकीच्या पद्धतीने स्पर्श करणे असे कृत्य केल्याचा आरोप आहे. मुलींनी घरी जाऊन पालकांना हा प्रकार सांगितल्यानंतर घटना उघडकीस आली. याप्रकरणी गेवराई पोलिसांनी संबंधित शिक्षकाला अटक केली आहे.
मिळालेल्या माहितीनुसार, लुखामसला येथील जिल्हा परिषद प्राथमिक शाळेत अविनाश ढेरे हे शिक्षक कार्यरत आहेत. त्यांच्याविरोधात चौथीत शिकणाऱ्या चार विद्यार्थिनींसोबत गैरवर्तन केल्याची तक्रार करण्यात आली आहे. शिक्षकाने मुलींसमोर कपडे काढून नाचल्याचा आणि त्यांना अयोग्य पद्धतीने स्पर्श केल्याचा आरोप तक्रारीत करण्यात आल्याचे समजते.
या मुलींनी घरी गेल्यानंतर पालकांना घडलेला प्रकार सांगितला. त्यानंतर संतप्त पालक शाळेत पोहोचले आणि त्यांनी संबंधित शिक्षकाला जाब विचारला. या घटनेमुळे परिसरात संतापाचे वातावरण निर्माण झाले.
घटनेची माहिती मिळताच गेवराई पोलिसांनी लुखामसला येथे धाव घेतली आणि संबंधित शिक्षकाला ताब्यात घेतले. या प्रकरणी पालकांच्या तक्रारीवरून शिक्षकाविरोधात पोक्सो कायदा आणि विनयभंगासंदर्भातील तरतुदींनुसार गुन्हा दाखल करण्यात आला आहे. त्यानंतर त्याला अटक करण्यात आली.
दरम्यान, या घटनेची माहिती गावात पसरल्यानंतर ग्रामस्थांनी कठोर कारवाईची मागणी केली. गुन्हा दाखल करून आरोपीला शिक्षा व्हावी, या मागणीसाठी मोठ्या संख्येने नागरिक गेवराई पोलीस ठाण्यात जमले होते.
अटक करण्यात आलेल्या शिक्षकाला न्यायालयात हजर केले जाणार असल्याची माहिती पोलिसांनी दिली आहे. या प्रकरणाचा पुढील तपास सुरू असून, विद्यार्थिनींच्या तक्रारी आणि आरोपांची कायदेशीर प्रक्रियेनुसार चौकशी केली जाणार आहे. अल्पवयीन मुलींशी संबंधित प्रकरण असल्याने त्यांच्या ओळखीची माहिती गोपनीय ठेवणे महत्त्वाचे आहे.
