लातूर: मराठवाड्यातील शिक्षणाची पंढरी आणि ‘लातूर पॅटर्न’मुळे ओळखल्या जाणाऱ्या लातूर शहरातून अत्यंत धक्कादायक आणि संतापजनक घटना उघडकीस आली आहे. शहरातील एका नामांकित शिक्षण संस्थेच्या मैदानावर गेल्या जवळपास अकरा महिन्यांपासून चार अल्पवयीन विद्यार्थिनींचे लैंगिक शोषण झाल्याचे समोर आले आहे. (Latur Crime)
आरोपी प्रशिक्षकाने या मुलींना आंतरराष्ट्रीय स्तरावरील क्रीडा स्पर्धेत खेळण्याची संधी मिळवून देण्याचे आमिष दाखवून त्यांचा गैरफायदा घेतला, अशी प्राथमिक माहिती समोर आली आहे. याप्रकरणी एका व्यक्तीविरोधात पॉक्सो कायद्याअंतर्गत गुन्हा दाखल करण्यात आला असून, या घटनेमुळे लातूर शहरात तणावाचे आणि संतापाचे वातावरण निर्माण झाले आहे.
हेही वाचा: धक्कादायक! मॉर्निंग वॉकसाठी घराबाहेर निघताच कॉंग्रेसच्या बड्या नेत्याचे अपहरण, घटना CCTV मध्ये कैद
नेमकं काय घडलं?
मिळालेल्या माहितीनुसार, या नामांकित संस्थेतील अल्पवयीन विद्यार्थिनी सॉफ्टबॉल खेळाचा सराव करत होत्या. हा सराव गेल्या 10 ते 11 महिन्यांपासून करत होत्या. याच सरावादरम्यान संस्थेतील आरोपी प्रशिक्षक या मुलींशी जवळीक साधण्याचा प्रयत्न करत होता.
प्रशिक्षक सराव करणाऱ्या मुलींशी लगट करायचा, नको त्या ठिकाणी त्यांना स्पर्श करायचा, बोलताना अश्लील शब्दांचा वापर करायचा, त्यांच्या अंगाखांद्यावर हात ठेवायचा, तसेच त्यांचे चुंबन देखील घ्यायचा, अशी माहिती समोर आली आहे.
मला हवं ते द्या…
“मी तुम्हाला आंतरराष्ट्रीय पातळीवरील स्पर्धेत खेळण्याची संधी उपलब्ध करून देतो, त्या बदल्यात तुम्ही मला हवं ते द्या,” असे बोलून हा नराधम प्रशिक्षक मुलींचा लैंगिक छळ करत असल्याची माहिती मिळत आहे.
प्रशिक्षकाचे हे विकृत कृत्य लक्षात येताच, पीडित मुलींनी आणि त्यांच्या पालकांनी तात्काळ पोलिसांत धाव घेतली. पोलिसांनी या घटनेचे गांभीर्य लक्षात घेऊन आरोपी प्रशिक्षकाविरोधात तत्काळ गुन्हा दाखल केला आहे.
या घटनेमुळे शिक्षण संस्थांमधील आणि विशेषतः क्रीडा क्षेत्रातील मुलींच्या सुरक्षिततेचा मुद्दा पुन्हा एकदा ऐरणीवर आला आहे. पोलीस या प्रकरणाचा कसून तपास करत आहेत.
हेही वाचा: पुण्यात अपघाताची मालिका सुरुच, भरधाव वेगाने येणाऱ्या दुचाकीची कारला धडक
