बीड: बीड (Crime News) जिल्ह्यामध्ये एका हरवलेल्या कुत्र्यावरून झालेला वाद इतका टोकाला गेला की, त्याचे रूपांतर चक्क रक्तरंजित हाणामारीत झाले आहे. अंबाजोगाई तालुक्यातील घाटनांदूर भागात ही धक्कादायक घटना घडली असून हरवलेल्या कुत्र्याची माहिती देण्याच्या बदल्यात पैशांची मागणी केल्यावरून दोन गटात तुफान राडा झाला. या हल्ल्यामध्ये एका तरुणाचे डोके फोडण्यात आले असून तो जागीच बेशुद्ध पडल्याने परिसरात एकच खळबळ उडाली आहे.
या घटनेची सुरुवात एका हरवलेल्या कुत्र्यासाठी दिलेल्या जाहिरातीमुळे झाली. माहिती देण्याच्या मोबदल्यात आरोपींनी 5000 रुपयांची मागणी केली होती. पैशांच्या या मुद्द्यावरून दोन्ही बाजूंमध्ये वाद झाला आणि त्यातूनच आरोपींनी कुरापत काढण्यास सुरुवात केली. 31 डिसेंबर रोजी सायंकाळी साळवे आणि त्यांच्या मित्रांना रस्त्यात गाठून शिवीगाळ व मारहाण करण्यात आली. त्यानंतर आरोपींनी त्यांचा पाठलाग करत लोखंडी गजाने हल्ला चढवला.
या भीषण मारहाणीत वेदांत बावने हा तरुण गंभीर जखमी झाला असून त्याच्यावर उपचार सुरू आहेत. या प्रकरणी अंबाजोगाई ग्रामीण पोलिसांनी करण चव्हाण, शोहेब कुरेशी यांच्यासह इतर सहा ते सात जणांविरुद्ध गुन्हा दाखल केला आहे. पोलीस निरीक्षक मुरलीधर खोकले यांनी फरार आरोपींना पकडण्यासाठी पथके रवाना केली आहेत. किरकोळ वाटणाऱ्या कारणावरून हा जीवघेणा हल्ला झाल्याने सध्या संपूर्ण परिसरात या प्रकरणाची चर्चा रंगली आहे.
