Pune Crime: पुणे : आरोग्य विभागातील बदलीसाठी ३ लाख रुपयांची लाच स्वीकारताना पुणे लाचलुचपत प्रतिबंधक विभागाच्या पथकाने जिल्हा परिषदेच्या आरोग्य अधिकाऱ्याला रंगेहाथ पकडले. ही कारवाई शुक्रवारी पुण्यातील जिल्हा परिषद कार्यालयासमोर करण्यात आली. या प्रकरणामुळे जिल्हा परिषदेत खळबळ उडाली आहे. Bribe Case
हेही वाचा- हरवलेल्या कुत्र्यावरून पेटला गँगवॉर; भररस्त्यात तरुणाला केली मारहाण, डोकं फोडलं अन् नंतर
रामकिसन गंगाधर घ्यार (वय ४३) असे अटक करण्यात आलेल्या अधिकाऱ्याचे नाव आहे. तो पुणे जिल्हा परिषदेत आरोग्य अधिकारी म्हणून कार्यरत आहे. एसीबीने दिलेल्या माहितीनुसार, तक्रारदार हा ४१ वर्षीय पुरुष आरोग्य कर्मचारी असून त्याची जून २०२५ मध्ये कोल्हापूर येथील उपसंचालक आरोग्य कार्यालयातून पुणे येथे बदली झाली होती. मात्र बदलीचा आदेश असूनही त्याला पुण्यात प्रत्यक्ष पदस्थापना देण्यात आली नव्हती. त्याला उपसंचालक कार्यालयात ठेवण्यात आले होते, जिथे कोणतेही मंजूर पद नव्हते.
त्यानंतर तक्रारदाराने इंदापूर तालुक्यातील बावडा येथील प्राथमिक आरोग्य केंद्रात रिक्त असलेल्या आरोग्य कर्मचाऱ्यांच्या पदासाठी अर्ज केला. याबाबत चौकशी करण्यासाठी त्याने पुण्यातील आरोग्य उपसंचालक डॉ. भगवान पवार यांच्याशी संपर्क साधला. त्यावेळी त्याला रामकिसन घ्यार यांना भेटण्यास सांगण्यात आले. घ्यार हे उपसंचालकांच्या नियमित संपर्कात असल्याचे सांगितले जाते.
तक्रारदाराशी झालेल्या भेटीत घ्यार यांनी बदलीची प्रक्रिया पूर्ण करण्यासाठी उपसंचालकांच्या वतीने ३ लाख रुपयांची लाच मागितल्याचा आरोप आहे. या मागणीमुळे तक्रारदाराने २ डिसेंबर २०२५ रोजी एसीबीकडे तक्रार दाखल केली. त्यानंतर एसीबीने ४ आणि ५ डिसेंबर रोजी पडताळणी करून लाचेची मागणी झाल्याची खात्री केली.
सापळा रचून २ जानेवारी २०२६ रोजी घ्यार याला ३ लाख रुपयांची लाच स्वीकारताना रंगेहाथ पकडण्यात आले. आरोपीविरुद्ध बंडगार्डन पोलिस ठाण्यात भ्रष्टाचार प्रतिबंधक कायदा १९८८ अंतर्गत गुन्हा दाखल करण्यात येत आहे. पुढील तपास सुरू आहे.
ही कारवाई एसीबी पुणेचे पोलिस अधीक्षक शिरीष सरदेशपांडे, अतिरिक्त पोलिस अधीक्षक अजित पाटील आणि अर्जुन भोसले यांच्या मार्गदर्शनाखाली करण्यात आली. सरकारी कर्मचाऱ्यांकडून लाचेची मागणी झाल्यास नागरिकांनी एसीबीच्या हेल्पलाइन, व्हॉट्सअॅप किंवा अधिकृत ईमेलवर तक्रार करावी, असे आवाहन करण्यात आले आहे.
