सोलापूर: सोलापूरमध्ये (Crime News) मनसे शहराध्यक्ष बाळासाहेब सरवदे यांच्या हत्या प्रकरणाने आता वेगळेच वळण घेतले आहे. या खुनाचा आरोप असलेल्या शिंदे कुटुंबाने आता चक्क मृत सरवदे यांच्याच नातेवाईकांविरोधात पोलिसात धाव घेतली आहे. या तक्रारीमुळे सोलापूरच्या राजकारणात मोठा गदारोळ माजला असून पोलिसांनी आता सरवदे कुटुंबातील १० सदस्यांवर गुन्हा दाखल केला आहे.
मिळालेल्या माहितीनुसार, हत्येतील मुख्य आरोपी शंकर शिंदे यांचा भाचा राहुल सरवदे याने फिर्याद दिली आहे. राहुलच्या दाव्यानुसार, निवडणुकीच्या वादातून बाळासाहेब सरवदे यांच्या कुटुंबीयांनी तलवार, कोयते आणि काठ्या घेऊन शिंदे यांच्या घरात घुसखोरी केली. यावेळी त्यांनी तुम्ही आमच्या विरोधात निवडणूक लढवू नका, असा दम देत घरातील सदस्यांना बेदम मारहाण केली. या हल्ल्यात माजी नगरसेविका शालन शिंदे यांच्यासह इतर काही जण जखमी झाल्याचे तक्रारीत म्हटले आहे.
या गंभीर आरोपांनंतर पोलिसांनी मृत बाळासाहेब सरवदे यांच्यासह त्यांच्या कुटुंबातील सदस्यांवर गुन्हा नोंदवला आहे. मृत व्यक्तीच्या कुटुंबावर मारहाणीचा गुन्हा दाखल झाल्याने तपास गुंतागुंतीचा झाला आहे. जेलरोड पोलीस सध्या या दोन्ही प्रकरणांची सखोल चौकशी करत असून परिसरात तणावाचे वातावरण आहे.
