छत्रपती संभाजीनगर : छत्रपती संभाजीनगर जिल्ह्यातील कन्नड तालुक्यात असलेल्या जामडी घाट परिसरात 13 जानेवारी रोजी एका तरुणाची हत्या करण्यात आली होती. या हत्या प्रकरणाचा ग्रामीण पोलिसांनी उलगडा केला आहे. या घटनेत त्याच गावातील स्थित आई आणि मुलाचा सहभाग असल्याचे तपासात स्पष्ट झाले असून या दोघांना अटक करण्यात आली आहे. माजी सरपंचांचा मुलगा राजू रामचंद्र पवार (वय 45) याचा मृत्यू हा खुनामुळे झाल्याचे निष्पन्न झाले आहे. या प्रकरणामुळे गावात मोठी खळबळ उडाली होती.
13 जानेवारी रोजी जामडी येथील वनभागात राजू पवार यांचा मृतदेह आढळून आला होता. मृतदेह आढळल्यानंतर परिसरात भीतीचे वातावरण निर्माण झाले होते. राजू पवार हे स्थानिक राजकारणात सक्रिय होते. त्यांच्या कुटुंबाचा गावातील कारभारात सहभाग असल्याने ही घटना अधिक चर्चेत आली. शासकीय कामांची कंत्राटे घेणारा व्यक्ती अशा प्रकारे मृत आढळल्याने पोलीस यंत्रणेसमोर गुन्ह्याचा तपास करणे आव्हानात्मक ठरले होते.
पोलीस अधीक्षक डॉ. विनयकुमार राठोड आणि अपर पोलीस अधीक्षक अण्णपूर्णा सिंह यांच्या मार्गदर्शनाखाली स्थानिक गुन्हे शाखा आणि कन्नड ग्रामीण पोलिसांनी तपास सुरू केला. सलग सहा दिवस तपास करून 71 गावकऱ्यांची चौकशी करण्यात आली. या चौकशीतून राजू पवार यांच्याशी मतभेद असलेल्या काही व्यक्तींची माहिती पुढे आली. त्यामध्ये वंदना पवार आणि तिचा मुलगा धीरज उर्फ टेमा यांची नावे समोर आली.
यानंतर आई आणि मुलाची स्वतंत्रपणे चौकशी करण्यात आली. सुरुवातीला दोघेही समाधानकारक उत्तरे देत होते. मात्र तपासादरम्यान मिळालेल्या काही पुराव्यांमुळे पोलिसांचा संशय अधिक बळावला. पुढील चौकशीत वंदनाने राजूकडून दीर्घकाळ त्रास होत असल्याची माहिती दिली. या कारणातूनच मुलासोबत हा गुन्हा केल्याची कबुली देण्यात आल्याचे पोलिसांनी सांगितले.
तपासात गुन्ह्यानंतर पुरावे नष्ट करण्याचा प्रयत्न झाल्याचेही समोर आले आहे. स्थानिक गुन्हे शाखा आणि कन्नड ग्रामीण पोलिसांच्या संयुक्त कारवाईमुळे या प्रकरणाचा उलगडा झाला असून पुढील तपास सुरू आहे.
