बीड : कोणतीही परीक्षा असली म्हणलं की, कॉपी करणे हा प्रकार समोर आलाच समजा. दहावी किंवा बारावी बोर्ड परीक्षांच्या काळात परीक्षा केंद्रावरील कॉपी आणि वाद ठरलेलंच आहे. परंतु, विद्यापीठाच्या पदवी परीक्षांमध्येही शिक्षक आणि विद्यार्थ्यांमध्ये वाद झाल्याची घटना समोर आहे.
बीडमधील शिरूर तालुक्यातील श्रीपत वाडी येथे भगवान बाबा महाविद्यालयामध्ये दोन विद्यार्थ्यांनी प्राध्यापकाला गजाने मारहाण केले. मारहाण केल्यानंतर परीक्षा केंद्रावर गोंधळ उडाला. विद्यार्थ्यांकडून गजाने मारहाण झाल्याने परीक्षा केंद्रावरील इतर शिक्षकांनी संताप व्यक्त केला आहे.
औरंगाबाद डॉ. बाबासाहेब आंबेडकर मराठावाडा विद्यापीठाच्या बीएससीच्या (BSC) परीक्षा सुरू आहेत. त्यावेळी श्रीपतवाडी येथील परीक्षा केंद्रावर विद्यार्थी आणि शिक्षकांमध्ये वाद झाला. परीक्षा केंद्रावर परीक्षेची प्रश्नपत्रिका का दिली नाही म्हणून दोन विद्यार्थ्यांनी प्राध्यापकाला गजाने मारहाण केली.
या घटनेत प्राध्यापक गंभीर जखमी झाले आहेत. त्यांना लगेच रुग्णालयात नेण्यात आले होते. याप्रकरणात मारहाण करणाऱ्या दोन्ही विद्यार्थ्यांवर शिरुर पोलीस ठाण्यात गुन्हा दाखल करण्यात आला आहे. परंतु या घटनेमुळे परीक्षा केंद्रावर तणावाचे वातावरण झाले होते. विद्यार्थ्यांकडून अशारितीने शिक्षकांना मारहाण होत असेल तर परीक्षा घ्यायच्या कशा, असा सवालही शिक्षकांनी विचारला.
भगवान बाबा महाविद्यालयामधील प्राध्यापक अशोक वारे हे परीक्षा केंद्रावर होते. त्यावेळी राहुल गर्जे आणि गंगाधर गर्जे या दोन विद्यार्थ्यांनी प्रश्नपत्रिका का दिली नाही म्हणून प्रा. अशोक वारे यांना गजाने मारहाण केली. या मारहाणीमध्ये अशोक वारे हे गंभीर जखमी झाले आहेत त्यांना शिरोळ येथील खाजगी रुग्णालयात उपचारासाठी दाखल करण्यात आले.
सध्या अशोक वारे यांची प्रकृती ठीक आहे. त्यांना मारहाण करणाऱ्या दोन्ही विद्यार्थ्यांवर शिरूर पोलीस ठाण्यात गुन्हा दाखल करण्यात आला आहे. पोलिसांनीही या घटनेची दखल घेत विद्यार्थ्यांविरुद्ध गुन्हा दाखल केला आहे. पुढील अधिक तपास पोलीस करत आहेत.
