छत्रपती संभाजीनगर : छत्रपती संभाजीनगरच्या वाळूज एमआयडीसीत हँडग्लोज बनवणाऱ्या कंपनीला लागलेल्या आगीत 6 कामगारांचा होरपळून मृत्यू झाला आहे. दरम्यान या दुर्घटनेवर मुख्यमंत्री एकनाथ शिंदे यांनी तीव्र शोक व्यक्त केला असून मृत कामगारांच्या नातेवाईकांना मुख्यमंत्री सहायता निधीतून प्रत्येकी 5 लाख रुपये देण्याचे निर्देश मुख्यमंत्र्यांनी दिले आहेत.
मृत कामगारांच्या नातेवाईकांना 5 लाखांचीमदत देण्यासोबतच जखमी कामगारांना तातडीने शासकीय खर्चाने सर्व वैद्यकीय उपचार द्यावेत अशाही सूचना त्यांनी प्रशासनाला दिल्या आहेत. आग शमविण्यासाठी तसेच अडकलेल्यांना सुखरूप काढण्यासाठी करण्यात आलेल्या बचाव कार्याची माहितीही त्यांनी घेतली. हे मदत कार्य व्यवस्थित पार पडण्यास सांगितले, असल्याची माहिती मुख्यमंत्री कार्यालयाकडून देण्यात आली आहे.
याबाबत मुख्यमंत्री एकनाथ शिंदे यांनी ट्वीट करत म्हटले आहे की, “छत्रपती संभाजीनगरच्या वाळूज औद्योगिक वसाहतीत एका हँडग्लोज बनवणाऱ्या कंपनीस लागलेल्या भीषण आगीच्या दुर्घटना दुर्दैवी आणि दुःखदायक आहे. मध्यरात्री लागलेल्या या आगीत सहा कामगारांचा जळून मृत्यू झाल्याची प्राथमिक माहिती असून या मृत कामगारांच्या नातेवाईकांना मुख्यमंत्री सहाय्यता निधीतून प्रत्येकी 5 लाख रुपये देण्याचे निर्देश दिले आहेत. याशिवाय जखमी कामगारांना तातडीने शासकीय खर्चाने सर्व वैद्यकीय उपचार द्यावेत अशाही सूचना प्रशासनाला दिल्या आहेत.”
