छत्रपती संभाजीनगर: दारू आणण्यासाठी घराबाहेर (Chhatrapati Sambhajinagar) गेलेला एक मित्र (Crime News) रात्री घरी परतला, तेव्हा त्याला आपली मैत्रिण दुसऱ्या मित्रासोबत अर्धनग्न अवस्थेत दिसली. या दृश्याने संतापलेल्या मित्राने दुसऱ्या मित्राची दांड्याने डोके ठेचून हत्या केल्याची खळबळजनक घटना जवाहर नगर पोलीस ठाण्याच्या हद्दीत घडली आहे. या प्रकरणी पोलिसांनी तिघांना ताब्यात घेतले आहे.
विशाल बंडू पाचकोरे (वय 32, राहणार काबरानगर) असे मयत झालेल्या व्यक्तीचे नाव आहे. तर सुधाकर शेषराव ढेपे (वय 48 राहणार काबरानगर), त्याची प्रेयसी आणि एका अल्पवयीन मुलाला पोलिसांनी ताब्यात घेतले आहे.
घटनेबद्दल अधिक माहिती अशी की, मूळचा मोर्चा हिंगोली येथील रहिवासी असलेला विशाल पाचकोरे शहरात कामासाठी आला होता. काही दिवसांपूर्वी त्याची रंगकाम करणाऱ्या सुधाकर ढेपे याच्याशी ओळख झाली होती. सुधाकर हा खोली घेऊन एकटा राहत होता. सोमवारी रात्री सुधाकर आणि त्याची प्रेयसी त्याच्या घरी आले होते.
त्यानंतर सुधाकर हा दारू आणण्यासाठी घराबाहेर गेला. रात्री सुमारे 11:30 वाजता विशाल हा सुधाकरच्या घरी गेला होता. रात्री 1 वाजता सुधाकर घरी पोहोचला असता त्याला त्याचा मित्र विशाल आणि त्याची प्रेयसी अर्धनग्न अवस्थेत पलंगावर आढळून आले. हे पाहून संतापलेल्या सुधाकरने क्षणाचाही विचार न करता घरातील लाकडी दांड्याने विशालच्या डोक्यावर हल्ला केला, ज्यात तो गंभीर जखमी झाला.
या हल्ल्यात विशालचा मृत्यू झाल्यानंतर, सुधाकरने प्रेयसी आणि अल्पवयीन मुलाच्या मदतीने त्याचा मृतदेह रस्त्यावर टाकून दिला. काबरानगर येथे अनोळखी मृतदेह आढळून आल्याची माहिती पोलिसांना मिळताच ते घटनास्थळी दाखल झाले आणि मृतदेह रुग्णालयात पाठवला. पोलिसांनी परिसरातील सीसीटीव्ही तपासले असता रात्री सुमारे 2 वाजता तिघेजण मृतदेह घेऊन जाताना दिसले. या माहितीवरून पोलिसांनी सुधाकरच्या खोलीची तपासणी केली असता घरात रक्त पुसल्याच्या खुणा दिसून आल्या. कसून चौकशी केल्यावर सुधाकरने प्रेयसी आणि अल्पवयीन मुलासह मिळून विशालच्या हत्येची कबुली दिली. या प्रकरणी पोलिसांनी तिघांना अटक केली आहे.
