जालना : राज्यामध्ये सद्या मराठा-ओबीसी आरक्षणाचा मुद्दा चांगलाच पेटलेला दिसून येत आहे. एकीकडे मराठा आंदोलक मनोज जरांगे पाटील हे गेले काही दिवस झाले उपोषणाला बसले होते. त्यांनी नुकतेच आपण उपोषण मागे घेत असल्याचे जाहीर केले आहे. अशातच आता धनगर आंदोलक लक्ष्मण हाके आणि नवनाथ वाघमारे यांनीही उपोषण मागे घेतले आहे.
धनगर आंदोलक लक्ष्मण हाके यांनी वदीगोद्री येथे ओबीसी महिला आणि मुलींच्या हाताने पाणी घेऊन उपोषण सोडलं आहे. उपोषणाच्या ७ व्या दिवशी हाकेंनी उपोषण सोडलं आहे. ओबीसी कोट्यातून धनगर समाजाला आरक्षण मिळावे, या मागणीसाठी लक्ष्मण हाके आणि नवनाथ वाघमारे उपोषणाला बसले होते.
