Accident News : छत्रपती संभाजीनगर : छत्रपती संभाजीनगर (Chhatrapati Sambhajinagar) शहरातील धुळे महामार्गावर वाळूज परिसरात मंगळवारी संध्याकाळी भीषण अपघात (Accident) झाला. भरधाव वेगाने येणाऱ्या एका ट्रकने दिलेल्या धडकेत दोन महिलांचा जागीच मृत्यू (Death) झाला. या घटनेमुळे परिसरात शोककळा पसरली असून नागरिकांमध्ये तीव्र संताप व्यक्त केला जात आहे.
अपघातात मृत्युमुखी पडलेल्या महिलांची ओळख अनुसया लालसिंग चव्हाण वय 42, रा. दारात, ता. उमरखेड, जि. यवतमाळ आणि वंदना नागोराव चव्हाण वय 35, रा. बोधडी, ता. किनवट, जि. नांदेड अशी झाली आहे. दोन्ही महिला वाळूज परिसरातून जात असताना धुळे महामार्गावर हा अपघात घडला. ट्रकचा वेग प्रचंड असल्याने धडक अतिशय जोराची होती आणि दोघींचा जागीच मृत्यू झाला.
घटना घडताच स्थानिक नागरिकांनी तातडीने पोलिस आणि आपत्कालीन सेवांना माहिती दिली. माहिती मिळताच वाहतूक शाखेचे पीआय राजेश यादव, पीएसआय शंकर शिरसाट, वाळूज एमआयडीसी पोलीस ठाण्याचे पीआय विनोद अबुज यांच्यासह पोलीस अधिकारी व कर्मचारी घटनास्थळी दाखल झाले. पोलिसांनी तात्काळ परिस्थिती नियंत्रणात आणत मृत महिलांना रुग्णालयात दाखल केले. मात्र डॉक्टरांनी तपासणीनंतर त्यांना मृत घोषित केले. त्यानंतर दोन्ही मृतदेह शवविच्छेदनासाठी शासकीय वैद्यकीय महाविद्यालय व रुग्णालयात पाठवण्यात आले.
अपघातानंतर ट्रक चालक घटनास्थळावरून फरार झाला आहे. या प्रकरणी वाळूज एमआयडीसी पोलीस ठाण्यात गुन्हा दाखल करण्यात आला असून पोलिसांकडून तपास सुरू आहे. फरार चालकाचा शोध घेण्यासाठी परिसरातील सीसीटीव्ही फुटेज तपासले जात आहे. या अपघातामुळे महामार्गावरील वेगवान वाहनांबाबत नागरिकांनी चिंता व्यक्त केली असून वाहतूक नियमांची कडक अंमलबजावणी करण्याची मागणी होत आहे.
