बदलापूर: बदलापूरातील शिंदेसेनेचे स्थानिक नेते वामन म्हात्रे यांच्या कुटुंबातील तब्बल सहा जणांना उमेदवारी देण्यात आल्याने विरोधकांनी शिंदे गटावर तीव्र टीकेची झोड उडवली. या वादानंतर आता भाजप आणि शिंदेसेना दोन्ही पक्षांनी उमेदवार निवड प्रक्रियेत काळजीपूर्वक भूमिका घेण्याचा निर्णय घेतला आहे. (badlapur politics)
समोर आलेल्या माहितीनुसार, एका घरातील केवळ दोन सदस्यांनाच उमेदवारी देण्याचे धोरण राबवण्यात येणार आहे. त्यामुळे नातेवाईकांना तिकीट मिळवण्यासाठी पक्षांतर करणाऱ्या काही स्थानिक नेत्यांना आता अडचणींचा सामना करावा लागू शकतो.
वामन म्हात्रे यांच्या कुटुंबातील सहा सदस्यांना तिकीट
कुळगाव–बदलापूर नगरपरिषदेच्या आगामी निवडणुकीत शिंदेसेनेने वामन म्हात्रे यांच्या कुटुंबातील सहा सदस्यांना तिकीट दिल्याने प्रश्नचिन्ह निर्माण झाले होते. वामन म्हात्रे यांच्या बरोबर त्यांच्या पत्नीला उमेदवारी देण्यात आली होती. त्याचप्रमाणे भाऊ तुकाराम, मेहुणी उषा, मुलगा वरुण आणि पुतणे भावेश यांनाही उमेदवारी मिळाली होती.
हेही वाचा: पुण्यात उपचाराच्या नावाखाली फसवणूक, तब्बल 14 कोंटीचा लावला गंडा, तिघांना अटक
राजकीय घराणेशाहीचा मुद्दा ऐरणीवर
या आधीही म्हात्रे कुटुंबातील चार सदस्यांनी 2015 च्या महापालिका निवडणुकीत शिवसेनेच्या तिकिटावर निवडणूक लढवली होती. त्यामुळे ‘राजकीय घराणेशाही’चा मुद्दा नव्याने ऐरणीवर आला आहे. स्थानिक भाजप नेत्यांनीही या तिकीटवाटपाचा निषेध नोंदवत शिंदे गटावर जोरदार हल्लाबोल केला आहे.
शिंदेसेनेला वाढत्या टीकेचा सामना करावा लागत असताना, कल्याण–डोंबिवलीसह इतर ठिकाणी अशा प्रकारची पुनरावृत्ती होऊ नये यासाठी दोन्ही पक्षांनी सावध पावले उचलत आहेत.
