नाशिक : नाशिक येथील डॉ. मनीषा जेजूरकर आत्महत्येप्रकरणी महत्वाची माहिती समोर आली आहे. या प्रकरणातील संशयित आरोपी डॉ. स्वाती चव्हाण यांना नाशिक जिल्हा न्यायालयाने जामीन मंजूर केला आहे. न्यायालयाने 50 हजार रुपयांच्या वैयक्तिक जातमुचलक्यावर आणि ठराविक अटी व शर्तींवर हा निर्णय दिला आहे.
डॉ. मनीषा जेजूरकर यांच्या आत्महत्येनंतर गंगापूर पोलीस ठाण्यात गुन्हा नोंदवण्यात आला होता. या प्रकरणात डॉ. मनीषा यांचे पती डॉ. नीलेश जेजूरकर आणि डॉ. स्वाती चव्हाण यांच्यावर आत्महत्येस प्रवृत्त करणे, मानसिक त्रास देणे व सार्वजनिक ठिकाणी अपमान करणे असे गंभीर आरोप ठेवण्यात आले आहेत.
पोलिसांच्या प्राथमिक तपादानुसार, आत्महत्येच्या काही वेळ आधी एका विवाह सोहळ्यात स्वाती चव्हाण यांनी डॉ. मनीषा यांचा अपमान केला होता.
तक्रारीतील माहितीनुसार, “तुझ्या पतीला तू आता आवडत नाहीस,” असे वाक्य स्वाती यांनी उच्चारले होते. या मानसिक धक्क्यामुळे आणि अपमानामुळेच डॉ. मनीषा यांनी हे टोकाचे पाऊल उचलल्याचा पोलिसांचा संशय आहे.या प्रकरणात मुख्य संशयित आरोपी असलेले पती डॉ. नीलेश जेजूरकर हे सध्या न्यायालयीन कोठडीत असून कारागृहात आहेत. दुसरीकडे, गंगापूर पोलीस या संपूर्ण घटनेचा सखोल तपास करत आहेत.
या प्रकरणाच्या जामीन अर्जावरील सुनावणीदरम्यान दोन्ही बाजूंच्या वकिलांचे युक्तिवाद ऐकल्यानंतर न्यायालयाने डॉ. स्वाती चव्हाण यांना दिलासा दिला. नाशिकसह संपूर्ण राज्यात चर्चेत आलेल्या या हायप्रोफाईल प्रकरणातील पुढील तपास व न्यायालयीन घडामोडींकडे सर्वांचे लक्ष लागले आहे.
