पुणे: आयसीसी महिला एकदिवसीय विश्वचषक 2025 (IND vs SA Final) मध्ये ऐतिहासिक कामगिरीकरून भारतीय महिला क्रिकेट संघाने विश्वचषकावर नाव कोरले आहे. हरमनप्रीत कौरच्या नेतृत्वाखालील टीमने अंतिम सामन्यात दक्षिण आफ्रिकेचा 52 धावांनी पराभव करून भारतासाठी ट्रॉफी जिंकली आहे. या दिमाखदार कामगिरीनंतर, बीसीसीआयने (BCCI) विश्वविजेत्या ‘टीम इंडिया’साठी मोठी बक्षीस रक्कम जाहीर करून खेळाडूंचा गौरव केला आहे. भारतीय बोर्डाने जाहीर केलेली ही रक्कम अनेक क्रिकेट बोर्डांच्या, विशेषतः पाकिस्तान क्रिकेट बोर्डाच्या एकूण बजेटपेक्षा अधिक आहे.
बीसीसीआयचे ₹ 51 कोटींचे रोख बक्षीस
बीसीसीआयचे सचिव देवजित सैकिया यांनी भारतीय संघासाठी तब्बल 51 कोटी रुपयांचे रोख बक्षीस जाहीर केले आहे. ही बक्षीस रक्कम केवळ खेळाडूंसाठी नसून, संपूर्ण सपोर्ट स्टाफ (प्रशिक्षक, सपोर्ट टीम) साठी असेल, असेही सैकिया यांनी स्पष्ट केले. सैकिया म्हणाले. हरमनप्रीत आणि तिच्या संघाने आज केवळ ट्रॉफीच जिंकली नाही, तर सर्व भारतीयांची मनेही जिंकली आहेत, असेही त्यांनी यावेळी नमूद केले.
आयसीसीच्या बक्षीस रकमेपेक्षा मोठी रक्कम
भारतीय क्रिकेट बोर्डाने (बीसीसीआय) जाहीर केलेली 51 कोटी रुपयांची ही रक्कम आयसीसीने विजेत्या संघासाठी निश्चित केलेल्या बक्षीस रकमेपेक्षाही मोठी आहे.
- ICC ने विश्वचषक जिंकणाऱ्या संघासाठी मोठी बक्षीस रक्कम जाहीर केली असून विश्वविजेत्या टीम इंडियाला 4.48 दशलक्ष अमेरिकन डॉलर्स मिळतील, ज्याचे भारतीय रुपयांमध्ये अंदाजे 39.78 कोटी रुपये इतके मूल्य आहे.
- बीसीसीआयचे 51 कोटी रुपयांचे बक्षीस या आयसीसी रकमेत आणखी भर घालणारे आहे.
केवळ विजेतेच नव्हे, तर विश्वचषकात सहभागी झालेल्या इतर संघांनाही आयसीसीने मोठी रक्कम दिली आहे. उपांत्य फेरीमध्ये पराभूत झालेल्या ऑस्ट्रेलिया आणि इंग्लंड या दोन्ही संघांना प्रत्येकी 1.12 दशलक्ष डॉलर्सची (अंदाजे 9.3 कोटी रुपये) रक्कम देण्यात आली आहे. तसेच, स्पर्धेत पाचव्या आणि सहाव्या क्रमांकावर राहिलेल्या संघांनाही प्रत्येकी 700,000 डॉलर्स (सुमारे 5.8 कोटी रुपये) इतके बक्षीस मिळाले आहे. आयसीसीने उपविजेत्या ठरलेल्या दक्षिण आफ्रिकेच्या संघासाठी 2.24 दशलक्ष डॉलर्स (अंदाजे 20 कोटी रुपये) इतकी रक्कम जाहीर केली आहे.
.भारतीय महिला संघाने मिळवलेला हा ऐतिहासिक विजय केवळ एक ट्रॉफी नसून, तो देशातील महिला क्रिकेटसाठी एक नवा सुवर्णकाळ सुरू करणारा आहे.
