लोणी काळभोर : नेपाळमधील तरुणाने चिंचेच्या झाडाखाली गळफास घेऊन आत्महत्या केल्याची धक्कादायक घटना घडली आहे. ही घटना कदमवाकवस्ती (ता. हवेली) ग्रामपंचायत हद्दीतील पांडवदंड परिसरात घडली. ही घटना सोमवारी (ता.1) सकाळी आठ वाजण्याच्या सुमारास उघडकीस आली.
रामबहादूर रणबहादूर कामी (वय १८, सध्या रा. संभाजीनगर, कदमवाकवस्ती, ता. हवेली, मुळ रा. नेपाळ) असे आत्महत्या केलेल्या तरुणाचे नाव आहे. मिळालेल्या माहितीनुसार, सोमवारी सकाळी मॉर्निंग वॉकला चाललेल्या नागरिकांना कदमवाकवस्ती ग्रामपंचायत हद्दीतील एका शेतातील चिंचेच्या झाडाखाली एक तरुण बेशुद्ध अवस्थेत पडलेला दिसला.
या घटनेची माहिती नागरिकांनी त्वरित लोणी काळभोर पोलिसांना दिली. घटनेची माहिती मिळताच लोणी काळभोर पोलीस ठाण्याचे पोलीस अंमलदार ईश्वर भगत व बालाजी बांगर हे तातडीने घटनास्थळी दाखल झाले. त्यावेळी पोलिसांना रामबहादूर हा निपचित अवस्थेत पडलेला आढळून आला. पोलिसांनी रामबहादूरचा मृतदेह ताब्यात घेऊन शवविच्छेदनासाठी ससून रुग्णालयात पाठविला आहे.
दरम्यान, रामबहादूरने आत्महत्या का केली, याचे कोणतेही कारण अद्याप समोर आलेले नाही. त्यादृष्टीने लोणी काळभोर पोलीस पुढील तपास करीत आहेत.
