Vijay Wadettiwar : पुणे : विरोधी पक्षनेते विजय वडेट्टीवार यांनी एकनाथ शिंदे सरकारला घेरण्याचा प्रयत्न केला आहे. नुकचेत दुष्काळग्रस्त हिंगोली जिल्ह्यातील शेतकरी कुटुंबांनी राज्य सरकारला अवयवांचे रेटकार्ड पाठविले आहे. यावरून विरोधी पक्षनेते विजय वडेट्टीवार यांनी एकनाथ शिंदे सरकारवर टीका केली आहे. कर्जाच्या डोंगराखाली दबलेला शेतकरी किती चिंतेत आहे ह्याचे भान महायुती सरकारला नाही, असा आरोप वडेट्टीवार यांनी केला आहे.
हिंगोली जिल्ह्यातील शेतकरी कुटुंबांनी ते सरकारकडे पाठवलेले शरीरातील अवयवांचे रेट कार्ड प्रचंड भितीदायक आहेत. यात किडनी ७५,००० रुपये/ १० नग, लिव्हर ९०,०००/ १० नग, डोळे – २५,०००/ १० नग यासह शरीरातील इतर अवयवांचे रेट आहे. त्यामुळे कर्जाच्या डोंगराखाली दबलेला शेतकरी किती चिंतेत आहे हे यातून दाखवण्याचा प्रयत्न असल्याचे सांगितले जात आहे. हेच शेतकरी जर आमदार, खासदार असते तर त्यांच्याकरीता खोके देण्याची तयारी या सरकारने त्वरित दाखवली असती. पण दुष्काळग्रस्त शेतकऱ्यांना मदत देण्यासाठी सरकारकडे निधी नाही, असी गंभीर टीका वडेट्टीवार यांनी केली आहे. शेतकऱ्यांना तातडीच्या मदतीची गरज आहे. हे आम्ही वारंवार सांगत आहोत. पण झोपेचं सोंग घेऊन शेतकऱ्यांच्या मागण्यांकडे दुर्लक्ष सरकार करत आहे, असा आरोप वडेट्टीवार यांनी केला आहे.
दहा शेतकऱ्यांनी अवयव काढले विक्रीला
हिंगोलीत बहुतांश शेतकऱ्यांची शेती ही पाऊसाच्या पाण्यावर अवलंबून असते. त्यामुळे दरवर्षी पिकाच्या पावसाअभावी उत्पादनात मोठी घट होते. त्यांच्यापाठोपाठ सोयाबीन पिकावर येलो मोझॅक हा रोग पडला. यामुळे यावर्षी खर्च जास्त उत्पादन कमी अशी परिस्थिती निर्माण झाली आहे. सध्या दुष्काळ असून नदी, ओढे कोरडे पडले आहेत. खरीप पिकात घट झाली आशा होती रब्बीपीकावर त्यावर देखील निसर्गाची अवकृपा यावर्षी परतीचा पाऊस पडला नसल्याने शेतातील तुर हरबरा वाळत आहेत. सततची नापिकी आणि बँकेकडुन घेतलेल पिक कर्ज फेडायचे कसे यामुळे हिंगोली जिल्ह्यातील दहा शेतकऱ्यांनी चक्क आपले अवयव विक्रीला काढले असल्याचे निवेदन तहसीलदारांमार्फत थेट मुख्यमंत्र्यांना पाठवण्यात आले आहे.
