Velhe : वेल्हे (ता. राजगड) : तालुक्यात चोरीच्या घटनांना आळा घालण्यासाठी व अनुचित प्रकार रोखण्यासाठी वेल्हे पोलीस स्टेशन तर्फे नागरिकांना महत्त्वाचे जाहीर आवाहन करण्यात आले आहे. सहाय्यक पोलीस निरीक्षक किशोर शेवते यांनी सर्व नागरीक, व्यावसायिक व भाडेमालकांनी सतर्क राहून पोलिसांना सहकार्य करण्याचे आवाहन केले आहे.
पोलीस स्टेशन अंतर्गत येणाऱ्या सर्व नागरिकांनी आपले घर, फ्लॅट, सदनिका किंवा रूम भाड्याने देताना संबंधित भाडेकरूसोबत विधिवत भाडेकरार करावा तसेच आधारकार्ड, पॅनकार्ड आदी कागदपत्रांच्या प्रती ठेवाव्यात. भाडेकराराची माहिती स्थानिक पोलीस ठाण्यास कळविणे बंधनकारक असल्याचेही स्पष्ट करण्यात आले आहे.
गावांमध्ये वास्तव्यास असलेले परप्रांतीय कामगार, तसेच कंपनी, हॉटेल, दुकान, लॉज, रिसॉर्ट, बंगलो, वीटभट्टी, पोल्ट्रीफार्म, राईस मिल, उसतोड आदी व्यवसायांमध्ये काम करणाऱ्या कर्मचाऱ्यांची संपूर्ण माहिती, नातेवाईकांचे संपर्क क्रमांक आणि ओळखपत्रांच्या प्रती ठेवाव्यात. संबंधितांची गुन्हेगारी पार्श्वभूमी तपासूनच त्यांना कामावर ठेवावे, असे निर्देश देण्यात आले आहेत.
गावात येणारे फिरते विक्रेते, एजंट व परप्रांतीय व्यावसायिक यांची ओळख पटवून घ्यावी तसेच आवश्यक असल्यास त्यांच्या मोबाईलवर फोटो घ्यावेत. बँका, पतसंस्था, सराफ कट्टा, मंदिरे किंवा मौल्यवान वस्तू असलेल्या घरांच्या परिसरात संशयास्पद हालचाली आढळल्यास तत्काळ पोलिसांना माहिती द्यावी, असे आवाहन करण्यात आले आहे.
वरील सूचनांचे पालन न केल्यास भारतीय न्याय संहिता कलम २२३ अन्वये संबंधितांवर गुन्हा दाखल करून कायदेशीर कारवाई करण्यात येईल, असा इशाराही पोलिसांकडून देण्यात आला आहे.
