विशाल कदम
(Uruli Kanchan News ) उरुळी कांचन : जिद्द, चिकाटी, मेहनत आणि अभ्यास करायची तयारी असेल तर यश निश्चित मिळते, ध्येय नक्कीच गाठता येते. हेच उरुळी कांचन (ता. हवेली) येथील मधुरा संतोष कुंजीर हिने सिद्ध करून दाखविले आहे. मधुराने भारतीय सैन्य दलात लेफ्टनंट पदाला गवसणी घालून गरुडझेप घेतली आहे. तिने मिळविलेल्या यशाचे पुरंदर, हवेली व दौंड तालुक्यातील नागरिकांकडून भरभरून कौतुक होत आहे.
UPSC परीक्षेत यश
इंडियन मिलिटरी अकादमी, ऑफिसर्स ट्रेनिंग अकादमी, इंडियन नेव्हल अकादमी आणि इंडियन एअर फोर्स अकादमीमध्ये कमिशन्ड ऑफिसर्सच्या भरतीसाठी केंद्रीय लोकसेवा आयोगामार्फत (Union Public Service Commission) संयुक्त संरक्षण सेवा परीक्षा (combined defence services)घेतली जाते. या परीक्षेत मधुरा ११ वी रँक मिळवली असून तिची भारतीय सैन्य दलात लेफ्टनंट पदासाठी महाराष्ट्रातून एकमेव निवड झाली
आहे.
मधुरा कुंजीर यांचे मुळगाव वाघापूर (ता. पुरंदर) आहे. मधुरा यांचे वडील संतोष कुंजीर हे पुरंदर तालूका शिक्षक पतसंस्थेचे संचालक तर आई स्वाती कुंजीर ह्या मुख्याध्यापिका आहेत. मधुराचे प्राथमिक व माध्यमिक शिक्षण उरुळी कांचन येथील एंजल हायस्कूलमध्ये झाले. दहावीच्या बोर्डाच्या परीक्षेत मधुराने उरुळी कांचन केंद्रात प्रथम क्रमांक पटकाविला होता.
त्यानंतर मधुराने बारावीचे शिक्षण पुणे येथील फर्ग्युसन कॉलेज मधून पूर्ण केले. तिने बारावीच्या परीक्षेत ९६ टक्के गुण मिळविले होते. इंजीनियरिंग क्षेत्राची आवड असल्याने तिने जेईई. ॲडव्हान्स परीक्षा दिली. आणि त्याही परीक्षेत तिने यश मिळविले. पुढे तिने पुणे येथील पी आय सी टी कॉलेजमधून कम्प्युटर सायन्स पदवी पूर्ण करून प्रथम श्रेणीत उत्तीर्ण झाली आहे.
दरम्यान, मधुराला लहानपणापासूनच सैन्य दलात अधिकारी होण्याची स्वप्न आजी सेवानिवृत्त मुख्याध्यापिका सिंधुबाई कुंजीर व आजोबा कै. सेवानिवृत्त मुख्याध्यापक लक्ष्मण कुंजीर यांच्याकडून प्रेरणा मिळाली. या प्रेरणेतून देशसेवा करण्याची प्रबळ इच्छा
मधुराच्या मनात तयार झाली. आणि तिच्या स्वप्नांना व इच्छांना बळ देण्याचे काम तिचे चुलते शिक्षक रमेश कुंजीर व चुलती शिक्षिका मनिषा कुंजीर यांनी केले आहे.
भारतीय सैन्य दलात लेफ्टनंट पदासाठी महाराष्ट्रातून एकमेव तरुणी म्हणून मधुराची निवड झाली आहे. मधुरा आता चेन्नई येथील ऑफिसर ट्रेनिंग अकॅडमीत प्रशिक्षणासाठी गेली आहे. प्रशिक्षण पूर्ण करण्याचे आव्हान एक मुलगी म्हणून तिने स्वीकारले आहे. आणि ती लवकरच भारतीय सैन्य दलात लेफ्टनंट पदावर काम करताना आपल्याला लवकरच दिसणार आहे.
अधिक बातम्या वाचण्यासाठी येथे क्लिक करा…!
Aditya Thackeray : आदित्य ठाकरेंचा यंग ग्लोबल लीडर्सच्या यादीत समावेश!
