पिंपरी: जुन्या पुणे मुंबई महामार्गावर हाफकिन कंपनीच्या गेट समोर झाडांना पाणी देणाऱ्या टँकरला भरधाव कारने पाठीमागून धडक दिली. या अपघातात दोघेजण गंभीर जखमी झाले आहेत. ही घटना गुरुवारी (दि. 23) सकाळी घडली. विठ्ठल लक्ष्मण देवकर (वय 30, रा. स्वारगेट, पुणे), केतन शिवाजी जाधव (वय 32, रा. दांडेकर पूल, पुणे) अशी जखमी झालेल्यांचे नावे आहेत.
याबाबत पोलिसांनी दिलेल्या माहितीनुसार, गुरुवारी सकाळी साडे दहा वाजताच्या सुमारास टँकर चालक नवनाथ जेरीथोर हे टँकरने रस्त्याच्या बाजूला असलेल्या झाडाला पाणी देत होते. त्यावेळी जुन्या पुणे-मुंबई महामार्गावरून कार वेगात आली. या कारमध्ये चार लोक होते. भरधाव कारने उभ्या असलेल्या टँकरला पाठीमागून जोरात धडक दिली. यामध्ये कार मधील दोघेजण गंभीर जखमी झाले.
अपघातात कारचे मोठे नुकसान झाले असून जखमींवर रुग्णालयात उपचार सुरू आहेत. तर या प्रकरणी पिंपरी पोलीस ठाण्यात कार चालक ईश्वर रामचंद्र कराळे (वय 32, रा. रुपीनगर, निगडी) याच्या विरोधात गुन्हा दाखल करण्याचे काम सुरू आहे.
