Pune News: पुणे : पुणे शहरात साखळी बॉम्बस्फोट घडवून आणण्याचा अतिरेक्यांचा कट होता. त्यासाठी त्या दहशतवाद्यांना थेट सिरियामधून सूचना मिळत होत्या, असा खळबळजनक दावा ‘एनआयए’ने केला आहे. या दाव्यामुळे शहरात एकच खळबळ उडाली आहे.
शहरात इसिस मॉड्यूल प्रकरणात एनआयएने आरोपपत्र दाखल केले आहे. या आरोपपत्रातून राष्ट्रीय तपास संस्थेने (एनआयए) धक्कादायक दावे केले आहेत. दहशतवाद्यांची एनआयएने केलेल्या चौकशीची माहिती आरोपपत्रानंतर समोर आली आहे.
कोथरूड परिसरात १९ जुलै २०२३ रोजी महम्मद इम्रान खान आणि महम्मद युनूस साकी याच्यासह शाहनवाझ आलमला दुचाकी चोरीचा प्रयत्न करताना पुणे पोलिसांनी पकडले होते. त्यानंतर त्यांच्या घराची झडती घेतली असताना शहानवाझ कोंढवा परिसरातून पोलिसांच्या तावडीतून पळून गेला होता. त्यानंतर इसिस मॉड्युल प्रकरणी धक्कादायक माहिती समोर आली आहे. एनआयएने महम्मद शाहनवाझ आलम (रा. न्यू महमूदा हाऊस, हजारीबाग, झारखंड) याला पोलिसांनी नुकतीच अटक केली आहे. त्याच्या चौकशीतून पुणे शहरात साखळी बॉम्बस्फोट घडवण्याचा कट असल्याचे समोर आले आहे. पुणे इसिस मॉड्यूल प्रकरणात यापूर्वी अटक केलेल्या इतर आरोपींशी शाहनवाझ आलमचा थेट संबंध असल्याचे तपासातून समोर आले आहे.
दरम्यान, या कौतुकास्पद कामगिरीबद्दल पुणे शहराचे पोलीस आयुक्त रितेश कुमार यांचे ‘एनआयए’च्या महासंचालकांनी पत्र लिहून अभिनंदन केले आहे. त्यामध्ये पुणे पोलिसांचे कौतूक केले आहे. पुणे पोलिसांनी ‘एनआयए’ने बक्षीस जाहीर केलेल्या दहशतवाद्यांना अटक केली. कोथरुड पोलिसांच्या कारवाईमुळे हे शक्य झाले आहे. पुणे पोलिसांच्या या कामगिरीची राष्ट्रीय स्तरवर मोठी मदत झाली आहे, असे ‘एनआयए’च्या महासंचालकांनी लिहिलेल्या पत्रात म्हटले आहे. यामुळे सातत्याने टीकेला समोरे जावे लागणाऱ्या पुणे पोलिसांचे मनोधैर्य या पत्रानंतर वाढले आहे.
