पुणे : पुण्यातील सातारा रस्त्यावर धनकवडीमध्ये अल्पवयीन मुलाने भरधाव चारचाकी गाडी चालवत सात ते आठ वाहनांना उडवल्याची घटना घडली. या घटनेत तीनजण जखमी झाल्याची प्राथमिक माहिती आहे. हा प्रकार आज17 नोव्हेंबरला दुपारी दोन वाजण्याच्या सुमारास घडला. नागरिकांनी या अल्पवयीन मुलांना चांगलाच चोप दिला आहे. याप्रकरणी पोलिसांनी दोन अल्पवयीन मुलांना ताब्यात घेतले आहे.
पोलिसांनी दिलेल्या अधिक माहितीनुसार, आंबेगाव पठार परिसरातील एक अल्पवयीन मुलगा भावाला न सांगता गाडी घेऊन राऊंड मारण्यासाठी आला होता. आपल्या मित्रांना घेऊन आय ट्वेंटी चारचाकीमधून राऊंड मारत असताना धनकवडी येथील सावरकर चौकात एका रिक्षाला धडक दिली.
अपघात झाल्यामुळे तसेच चौकातील नागरिक मागे लागल्याने अल्पवयीन मुलाने घाबरून भरधाव वेगात पुन्हा गाडी पळवली. यामुळे रस्त्यात असणाऱ्या सात ते आठ वाहनांना धडक दिली. वाहनांना धडक दिल्यानंतर स्थानिक तरुणांनी त्याचा पाठलाग करुन त्याला पकडून चांगलाच चोप दिला. यानंतर नागरिकांनी अल्पवयीन मुलाला तसेच्या त्याच्या मित्रांना पोलिसांच्या ताब्यात दिले. (Pune Accident News)
