पुणे : मेट्रोच्या पादचारी पुलाच्या कामामुळे भिडे पूल (Pune News) गेल्या काही महिन्यांपासून बंद होता. मात्र, दिवाळीच्या पार्श्वभूमीवर मध्यवर्ती भागात होणारी गर्दी आणि वाहतूक कोंडी लक्षात घेता पुणे वाहतूक विभागाने हा पूल वाहतुकीसाठी तात्पुरता सुरू करण्याचा निर्णय घेतला आहे.
भिडे पुल वाहतुकीसाठी शनिवारपासून (11 ऑक्टोबर) खुला करण्यात येणार आहे. सकाळी सहा ते रात्री दहा वाजेपर्यंत भिडे पुलावरील वाहतूक सुरू राहणार असल्याचं सांगण्यात आलं आहे.
भिडे पूल बंद असल्याने वाहनचालकांना त्रास सहन करावा लागत होता. चालकांना वळसा घालून पुन्हा डेक्कन जिमखान्याकडे यावे लागत होते. अशातच भिडे पुल वाहतूक सुरू व्हावा याची मागणी सजग नागरिक मंचाने केली होती.
अशातच दिवाळीनिमत्त भिडे पूल सकाळी सहा ते रात्री दहा यावेळेत वाहतुकीस खुला करुन देण्यात येणार असून, रात्री दहानंतर मेट्रो पुलाच्या कामानिमित्त भिडे पूल वाहतुकीस बंद ठेवण्यात येणार आहे. दरम्यान, पुढील आदेश येईपर्यंत भिडे पुलावरील वाहतूक थांबवण्यात येणार नाही. अशी माहिती वाहतूक शाखेचे पोलीस उपायुक्त हिंमत जाधव यांनी दिली.
मेट्रोच्या कामासाठी हा पूल 9 सप्टेंबर 2025 पासून बंद ठेवण्यात आला होता. गणेशोत्सवात पूल तात्पुरता खुला केला होता. आता दिवाळीच्या निमित्ताने पूल पुन्हा वाहतुकीसाठी खुला करण्यात येणार आहे.
