Pune News : जळगाव : सरसकट मराठा आरक्षण मिळावे, या मागणीसाठी आंतरवली सराटा येथे उपोषणाला बसलेले आंदोलक मनोज जरांगे पाटील यांनी आज पत्रकार परिषद घेत आपली भूमिका मांडली आहे. या वेळी त्यांनी राज्य सरकारला महत्त्वाचे आवाहन केले आहे. उपोषण मागे घेण्यासाठी मुख्यमंत्री एकनाथ शिंदे, उपमुख्यमंत्री देवेंद्र फडणवीस, छत्रपती घराण्याचे सातारा गादीचे वंशज उदयनराजे भोसले आणि कोल्हापूर गादीचे वंशज संभाजीराजे छत्रपती यांनी उपोषणस्थळी यावे, असे आवाहन मनोज जरांगे पाटील यांनी केले आहे.
मनोज जरांगे यांच्या सरकारला पाच अटी
उपोषण मागे घेण्यासाठी मनोज जरांगे यांनी सरकारला पाच अटी घातल्या आहेत. सरकारने नेमलेल्या समितीचा अहवाल काहीही आला तरी मराठ्यांना सरसकट आरक्षण द्यावे. मराठा आरक्षणासाठी आंदोलन करणाऱ्या आंदोलकांवरील गुन्हे मागे घ्यावेत. लाठीचार्ज करणाऱ्या सर्व पोलीस अधिकाऱ्यांना निलंबित करावे, उपोषण सोडायला मुख्यमंत्री, दोन्ही उपमुख्यमंत्री, सर्व मंत्री, उदयनराजे भोसले, संभाजीराजे छत्रपती यांनी यावे तसेच सरकारच्या वतीने सर्व लेखी मिळाले पाहिजे, अशा पाच प्रमुख अटी मनोज जरांगे यांनी ठेवल्या आहेत.
दरम्यान, मराठा आरक्षणाबाबत ठोस निर्णयासाठी महाराष्ट्र सरकारने काल सर्वपक्षीय बैठक घेतली. या बैठकीत सर्वानुमते मनोज जरांगे पाटील यांच्याकडे मराठा आरक्षण लागू करण्यासाठी एक महिन्याचा वेळ मागितला आहे. त्यानंतर मनोज जरांगे यांनी उपोषण मागे घेण्याबाबत सूचक वक्तव्य केले. उपोषण मागे घेतले तरी उपोषणस्थळी आंदोलन सुरुच राहणार, असे जरांगे यांनी म्हटले आहे.
मनोज जरांगे पाटील यांच्या निर्णयावर प्रतिक्रीया देताना मुख्यमंत्री एकनाथ शिंदे म्हणाले की, सरकार मराठा आरक्षणावर सरकारात्मक निर्णय घेणार आहे. सर्वपक्षीय बैठकीत देखील मराठा आरक्षणावर चर्चा झाली आहे. मनोज जरांगे यांची भूमिका समजून घेऊन निर्णय घेतला जाईल.
