पुणे: जर्मनीतील हॉटेल व्यवसायात गुंतवणूक केल्यास आकर्षक परताव्याचे आमिष दाखवून एका 54 वर्षीय पुणेकराची 54 लाख रुपयांची फसवणूक झाल्याचा प्रकार समोर आला आहे. या प्रकरणी समर्थ पोलीस ठाण्यात पाच जणांविरुद्ध गुन्हा दाखल करण्यात आला आहे.
काय घडले?
हरदीपसिंग होरा (वय 54) यांनी पोलिसांत दिलेल्या तक्रारीनुसार, सप्टेंबर 2024 ते मे 2025 या काळात ही घटना घडली. गुजरात, जर्मनी आणि मध्य प्रदेश येथील पाच आरोपींनी होरा यांच्याशी संपर्क साधला. त्यांनी जर्मनीच्या ‘किल’ शहरात नवीन हॉटेल सुरू करण्याचे आश्वासन दिले.
या गुंतवणुकीतून मोठा नफा मिळेल, असे सांगून आरोपींनी होरा यांना 54 लाख रुपये गुंतवण्यास प्रवृत्त केले. या रकमेच्या बदल्यात हॉटेलमध्ये 25 टक्के भागीदारी मिळेल आणि त्यांच्या मुलाला दरमहा 2 लाख रुपये पगाराची नोकरी मिळेल, असेही आमिष दाखवण्यात आले. एवढेच नाही, तर होरा यांच्या भाच्यालाही भागीदार बनवण्याचे आश्वासन देण्यात आले होते.
या आश्वासनांवर विश्वास ठेवून होरा यांनी आरोपींना 54 लाख रुपये दिले. मात्र, त्यानंतर आरोपींनी ना कोणते हॉटेल सुरू केले, ना त्यांना दिलेले आश्वासन पाळले. आपली फसवणूक झाल्याचे लक्षात आल्यावर होरा यांनी पोलिसांकडे तक्रार केली.
गुन्हा दाखल, तपास सुरू
या प्रकरणी पोलिसांनी किरण कुमार त्रिवेदी, चंद्रेश त्रिवेदी, जानव्ही चंद्रेश त्रिवेदी, निती पांड्ये आणि तृप्ती नितीन पांड्ये यांच्यावर फसवणुकीचा गुन्हा दाखल केला आहे. पोलीस या प्रकरणाचा सखोल तपास करत आहेत.
