पुणे : पुणे ते लोणावळा दरम्यान दररोज कर्मचारी, विद्यार्थी आणि अन्य प्रवासी लोकलने प्रवास करत असतात. प्रवाशांची संख्या दिवसेंदिवस वाढतच चालली आहे. परिणामी खासगी वाहने रस्त्यावर मोठ्या प्रमाणात येऊन वाहतूक कोंडी होत आहे. त्यामुळे पुणे-लोणावळा लोकलच्या फेऱ्या वाढवाव्यात. याचा पुणे लोणावळा मार्गावरील नागरिकांना फायदा होईल तसेच रेल्वेच्या उत्पन्नातही भर पडेल, अशी मागणी जोर धरत आहे. दरम्यान, याच मागणीसाठी मनसेकडून लोणावळा रेल्वे स्थानकात ‘रेल रोको’ आंदोलन करण्यात आले. मनसेच्या कार्यकर्त्यांनी रेल्वे रुळावर उतरून काही मिनिटे डेक्कन क्वीन रोखली.
पीएमपीएमएलची बस व्यवस्था ही टप्पा वाहतूक पद्धतीने होत असल्याने त्याचा भुर्दंड नागरिकांना बसतो. पुणे लोणावळा रेल्वे प्रवास तुलनेने स्वस्त आणि खात्रीशीर असल्याने रेल्वे प्रशासनाने यावर त्वरित निर्णय घेऊन प्रवाश्यांना लोकलची संख्या पूर्ण क्षमतेने वाढवून दिलासा द्यावा, अशी मागणी या वेळी मनसे कार्यकर्त्यांनी केली. मावळ, पिंपरी-चिंचवड शहरातील हजारो जण दररोज लोणावळ्यात कामानिमित्त जातात. लोणावळा हे पर्यटन क्षेत्र असल्याने अनेक पर्यटक रेल्वेमार्गाने लोणावळ्यात येणे पसंत करतात. लोकलच्या फेऱ्या कमी असल्याने शिक्षणासाठी पुण्यात येणाऱ्या विद्यार्थ्यांना देखील तासन्तास लोणावळा रेल्वे स्टेशनवर वाट बघत पाहत बसावे लागते.
लांब पल्ल्याच्या एक्सप्रेस देखील लोणावळ्यात थांबा घेत नाहीत. सकाळी दहा नंतर थेट तीन वाजता लोणावळा-पुणे लोकल आहे. यामुळे नागरिकांची आणि विद्यार्थ्यांची गैरसोय होत आहे. हीच मागणी घेऊन लोणावळा मनसेने ‘रेल रोको’ आंदोलन केले.
दरम्यान, या वेळी मनसेकडून स्टेशन मास्तरला स्मरणपत्र देण्यात आले. मनसेच्या मागणीची दखल न घेतल्यास लोणावळा स्टेशनवरून यापुढे रेल्वे पुढे न जाऊ देण्याचा इशारा मनसेने दिला आहे.
