पनवेल : सायन- पनवेल महामार्गाजवळ मानखुर्द टी- जंक्शन येथे गुरुवारी रात्री भीषण अपघाताची घटना घडली आहे. डंपर ट्रक, १८ चाकी ट्रेलर डंपर आणि रिक्षाची जोरदार धडक झाल्याने भीषण अपघात झाला. या अपघातात ३ जणांसह ९ महिन्याचं बाळ गंभीर जखमी झाले आहे. मोहम्मद अन्सारी असं रिक्षा चालकाचं नाव आहे. जखमींवर रुग्णालयात उपचार सुरु आहेत.
मिळालेल्या अधिक माहितीनुसार, रात्री पावणे बाराच्या सुमारास हा अपघात झाला आहे. ऑटो रिक्षा वाशीच्या दिशने जात होती. रस्त्याच्या मधोमध पार्किंग लाईट न लावता एक डंपर ट्रक चालला होता. डंपर पुढे जात असताना त्याच्या विरुध्द दिशेने येणारा दुकारा १८ चाकी ट्रेलर डंपरला जोरात धडकला. ही धडक एवढी भीषण होती की, डंपर डाव्या बाजूला असलेल्या ऑटो रिक्षावर जोरात आदळला.
या अपघातात अब्दुल डबीर आणि त्याची पत्नी तस्मिया आणि त्यांची चिमुकली गंभीर जखमी झाले आहेत. त्याच्या चेहऱ्याला आणि डोक्याला दुखापत झाली असल्याची प्राथमिक माहिती आहे. तसेच रिक्षा चालक देखील जखमी झाला आहे.
या घटनेची माहिती मिळताच पोलिस घटनास्थळी दाखल झाले असून सर्व जखमींना राजावाडी रुग्णालयात प्राथमिक उपचारासाठी दाखल केलं आहे. पुढील तपास सुरु आहे.
