हडपसर, ता. ८ : जिममध्ये सुरू असलेले गाणे बदलल्याच्या क्षुल्लक कारणावरून एका तरुणावर डंबेल, लोखंडी रॉड तसेच लाथाबुक्क्यांनी बेदम मारहाण केल्याची धक्कादायक घटना घडली आहे. ही घटना हडपसर येथील सातववाडी परिसरातील ‘श्री फिटनेस’ जिममध्ये ६ जुलै रोजी सायंकाळच्या सुमारास घडली आहे. या हल्ल्यात तरुणाच्या डोक्याला गंभीर दुखापत झाली असून, हडपसर पोलिसांनी तिघांविरुद्ध गुन्हा दाखल करून पुढील तपास सुरू केला आहे.
सूरज मुसळे, राज (पूर्ण नाव व पत्ता अज्ञात) आणि त्यांचा आणखी एक अज्ञात साथीदारावर गुन्हा दाखल करण्यात आला आहे. याप्रकरणी मुद्दसर रफिक सय्यद (वय २९, रा. सातववाडी, हडपसर) यांनी हडपसर पोलिस ठाण्यात फिर्याद दिली आहे. पोलिसांनी दिलेल्या माहितीनुसार, फिर्यादी मुद्दसर सय्यद हे गेल्या वर्षभरापासून श्री फिटनेस जिमचे सदस्य असून, नेहमीप्रमाणे व्यायामासाठी गेले होते. व्यायाम करत असताना त्यांनी जिममध्ये सुरू असलेले गाणे बदलून दुसरे गाणे लावले. याच कारणावरून जिममध्ये व्यायाम करणारा सूरज मुसळे याने संताप व्यक्त करत शिवीगाळ सुरू केली.
फिर्यादीने याबाबत जाब विचारताच सूरज मुसळे याने “मी कोण आहे, तुला माहिती आहे का?” अशी दमदाटी करत त्यांच्यावर धावून गेला. त्यानंतर त्याचा साथीदार राज तसेच आणखी एक साथीदारही तेथे आला. तिघांनी मिळून मुद्दसर सय्यद यांना शिवीगाळ करत मारहाण करण्यास सुरुवात केली. यावेळी सूरज मुसळे याने जिममधील लोखंडी डंबेल थेट फिर्यादीच्या डोक्यात फेकून मारला, त्यामुळे ते खाली कोसळले आणि त्यांच्या डोक्यातून रक्तस्त्राव सुरू झाला. त्यानंतर राज आणि त्याच्या साथीदाराने लाथाबुक्क्यांनी मारहाण करत लोखंडी रॉडने डाव्या खांद्यावर आणि उजव्या पायाजवळ वार केला आहे.जिममधील इतर सदस्य मदतीला धावून आल्याने तिन्ही आरोपी घटनास्थळावरून पळून गेले.
जखमी मुद्दसर सय्यद यांना त्यांच्या कुटुंबीयांनी तातडीने वैद्यवाडी येथील साई क्लिनिकमध्ये उपचारासाठी दाखल केले. उपचारानंतर त्यांनी हडपसर पोलीस ठाण्यात फिर्याद दाखल केली. या प्रकरणी सूरज मुसळे, राज आणि त्यांचा आणखी एक अज्ञात साथीदार यांच्याविरुद्ध हडपसर पोलीस ठाण्यात गुन्हा दाखल करण्यात आला असून, पोलीस उपनिरीक्षक राघवेंद्र सलगर पुढील तपास करीत आहेत.
