राहुलकुमार अवचट
यवत :- पुणे-सोलापूर महामार्गावरील यवत (ता. दौंड) ग्रामस्थांनी रविवारी (ता. १७) पारंपरिक पद्धतीने संपूर्ण गाव बंद ठेवून गावच्या शिवेबाहेर जाऊन वनभोजनाचा आनंद लुटला.
यवत ग्रामपंचायत हद्दीत २५ हजारापेक्षा जास्त नागरिक वास्तव्यास आहेत. अनेक वर्षाची वनभोजनाची परंपरा जपत आषाढ महिन्यात एक दिवस संपूर्ण गाव बंद ठेवून गावच्या शिवेबाहेर जावून वनभोजनाचा आनंद घेतात. या गावाचे वेगाने शहरीकरण होत असुनही अनेक वर्षापासुन चालत आलेली जुनी परंपरा जपली जात आहे.
रविवारी सकाळी श्री काळभैरवनाथ व महालक्ष्मीची मातेची फेरीची ग्रामप्रदक्षिणा काढण्यात आली. यावेळी ग्रामस्थांनी नैवेद्य व नारळ फोडून राहते घर व दैनंदिन व्यवहार बंद करुन वनभोजनासाठी गावाबाहेर पडले. गावातील हॉटेल, किराणा, तसेच सर्व दुकानदारांनी दुकाने उत्फूर्तपणे बंद ठेवली होती. रविवार असल्याने बँका, शाळा, सरकारी कार्यालयांना सुट्टी होती. त्यामुळे गावात शुकशुकाट पाहायला मिळाला. गावात येणाऱ्या बाहेरील लोकांना गावात कोणत्याही प्रकारचा प्रवेश रस्त्यांवर दोरी लावून वाहनांना प्रवेश बंद करण्यात आले होते.
दरम्यान, बाहेरील नागरिकांना वनभोजनासाठी गाव बंद असल्याचे सांगितल्यावर या परंपरेबद्दल त्यांचे कुतूहल निर्माण झाले. ग्रामस्थांनी गावच्या शिवेवर तसेच आपआपल्या शेतात सोयीनुसार समूहाने जाऊन गोडधोड जेवणासह वनभोजनाचा आनंद लुटला तर तरुणाई पावसाचा आनंद घेण्यासाठी बाहेर पडले. सायंकाळी पुन्हा नागरिक गावात परत येतात.
