उरुळी कांचन, (पुणे) : उरुळी कांचन पोलीस ठाण्याच्या हद्दीतील शिंदवणे (ता. हवेली) गावच्या हद्दीत (Uruli Kanchan News) बेकायदेशीर शस्त्र बाळगणाऱ्या दोन अट्टल गुन्हेगारांना स्थानिक गुन्हे शाखेच्या पथकाने जेरबंद केले आहे. गुरुवारी (ता. 26) रात्री साडेनाऊ वाजण्याच्या सुमारास काळेशिवार कॅनोल रोड परिसरात हि कारवाई करण्यात आली आहे.
रियाज हुसेन मुलाणी (वय-30 रा. बगाडे मळा, उरुळी कांचन) व इक्बाल शमिम खान (वय-31, रा. तुपेवस्ती, उरुळी कांचन) अशी अटक करण्यात आलेल्या दोघांची नावे आहेत. त्यांच्याकडून एक लोखंडी गावठी पिस्तुल आणि दोन जिवंत काडतुसे जप्त करण्यात आली आहेत. विशेष म्हणजे, स्थानिक पोलीस या हालचालींबाबत अनभिज्ञ असल्याने उरुळी कांचन पोलीस नेमके करतात काय असा प्रश्न या निमित्ताने नागीरीकानी उपस्थित केला आहे.
मिळालेल्या माहितीनुसार, गुरुवारी (ता. 26) रात्री साडेनाऊ वाजण्याच्या सुमारास स्थानिक गुन्हे शाखेचे पोलीस हवालदार योगेश नागरगोजे आणि त्यांचे पथक शिंदवणे परिसरात गस्तीवर होते. यावेळी काळेशिवार येथील कॅनॉल रोडवर दोन संशयित तरुण दुचाकीवरून जात असताना पोलिसांना आढळले. पथकाने शिताफीने त्यांना अडवून त्यांची झडती घेतली असता, त्यांच्याकडे विनापरवाना गावठी बनावटीचे पिस्तुल आणि पितळी धातूची दोन जिवंत काडतुसे मिळून आली.
त्यांचाकडे चौकशी केली असता त्यांनी त्यांची नावे वरीलप्रमाणे सांगितली. त्यांच्या अंगाची झाडाझडती घेतली असता 50 हजार रुपये किमतीचे गावठी पिस्तुल आणि 2 जिवंत काडतुसे, 50 हजार रुपये किमतीची होंडा कंपनीची दुचाकी, ॲपल आणि सॅमसंग कंपनीचे महागडे मोबाईल फोन असा एकूण 1 लाख 62 हजारांचा मुद्देमाल जप्त केला आहे.
दरम्यान, याप्रकरणी उरुळी कांचन पोलीस ठाण्यात दोघांवर भारतीय हत्यार कायदा कलम 3, 25 आणि भारतीय न्याय संहिता कलम (5) नुसार गुन्हा दाखल करण्यात आला आहे.
स्थानिक पोलिसांचे दुर्लक्ष?
उरुळी कांचन आणि परिसरात गुन्हेगारीने डोके वर काढले असताना स्थानिक पोलिसांना या शस्त्रांची आणि गुन्हेगारांच्या हालचालींची पुसटशीही कल्पना नव्हती. स्थानिक गुन्हे शाखेने (LCB) गावात येऊन ही कारवाई केल्याने, उरुळी कांचन पोलीस केवळ बघ्याची भूमिका घेत आहेत का? असा संतप्त सवाल नागरिक विचारत आहेत. या कारवाईमुळे स्थानिक पोलिसांच्या ‘गुप्तचार’ आणि गस्तीवर मोठे प्रश्नचिन्ह उभे राहिले आहे.
