पुणे : राज्यात एकीकडे थंडीचा प्रभाव वाढत असताना दुसरीकडे ‘अक्वान’ चक्रीवादळामुळे पावसाचे संकट निर्माण झाले आहे. बंगालच्या उपसागरात तयार झालेल्या या चक्रीवादळाचा परिणाम महाराष्ट्रातील काही भागांमध्ये जाणवू लागला आहे. भारतीय हवामान विभागाच्या अंदाजानुसार, हे वादळ उत्तर आंध्र प्रदेश आणि दक्षिण ओडिशाच्या किनारपट्टीवरील गोपाळपूरजवळ धडकण्याची शक्यता आहे. यामुळे विदर्भातील काही जिल्ह्यांमध्ये पावसाची शक्यता वर्तवण्यात आली आहे.

विदर्भात काही ठिकाणी शुक्रवारी हलक्या पावसाने हजेरी लावली. शनिवारपासून विजांच्या कडकडाटासह पाऊस पडण्याचा अंदाज असून काही भागांत वादळी वारेही वाहू शकतात. त्यामुळे नागरिकांनी हवामानातील बदल लक्षात घेऊन खबरदारी घ्यावी, असे आवाहन करण्यात येत आहे.
दरम्यान, लातूर जिल्ह्यातील औराद शहाजानी परिसरात थंडीचा जोर वाढला आहे. 20 नोव्हेंबर रोजी येथे किमान तापमानाची नोंद 7 अंश सेल्सिअस इतकी झाली. गेल्या काही दिवसांपासून या भागातील तापमान 7 ते 11.5 अंशांच्या दरम्यान आहे. दिवसा तापमान 32 ते 33 अंशांपर्यंत जात असल्याने उन्हाचा चटका जाणवतो, तर रात्री आणि पहाटे थंडीचा कडाका वाढतो. त्यामुळे ग्रामीण भागात शेकोट्या पेटू लागल्या असून उबदार कपड्यांचा वापरही वाढला आहे.

दुसरीकडे, गोंदिया जिल्ह्यात अवकाळी पावसाने शेतकऱ्यांची चिंता वाढवली आहे. शुक्रवारी सकाळी सुरू झालेल्या हलक्या पावसाचा जोर दुपारनंतर काही भागांत वाढला. सध्या धान कापणी आणि मळणी सुरू असल्याने शेतात ठेवलेले कापलेले पीक भिजण्याची भीती आहे. त्यामुळे शेतकऱ्यांचे नुकसान होण्याची शक्यता व्यक्त केली जात आहे.
चंद्रपूर जिल्ह्यातही शुक्रवारी सकाळी अतिशय हलक्या पावसाच्या सरी कोसळल्या. पावसाचा जोर वाढल्यास आगामी रब्बी पिकांना त्याचा फायदा होऊ शकतो. पुढील काही दिवस राज्यातील हवामानात बदल होण्याची शक्यता असल्याने शेतकरी आणि नागरिकांनी हवामान विभागाच्या सूचनांकडे लक्ष ठेवणे आवश्यक आहे.






