पुणे: पुणे जिल्ह्यात पुन्हा एकदा गोळीबाराची घटना घडल्याने खळबळ उडाली आहे. शिरूर तालुक्यातील करडे घाट परिसरात दोन गुन्हेगार गटांमधील जुन्या वादातून झालेल्या गोळीबारात सराईत गुन्हेगार विशाल काळे याचा मृत्यू झाला आहे. या घटनेमुळे परिसरात तणावाचे वातावरण निर्माण झाले आहे. (Pune Crime)
मिळालेल्या माहितीनुसार, करडे घाट परिसरात दोन गुन्हेगार गट आमनेसामने आले होते. दोन्ही गटांमध्ये पूर्वीपासून वाद सुरू असल्याचे सांगितले जात आहे. हा वाद विकोपाला गेल्यानंतर एका गटाकडून गोळीबार करण्यात आला. या गोळीबारात विशाल काळे गंभीर जखमी झाला. त्याला उपचारासाठी नेण्यात आले, मात्र त्याचा मृत्यू झाल्याची प्राथमिक माहिती समोर आली आहे.
घटनेची माहिती मिळताच पोलिसांनी तातडीने घटनास्थळी धाव घेतली. परिसराची पाहणी करून पुरावे गोळा करण्यात आले असून हल्लेखोरांचा शोध सुरू आहे. या प्रकरणाचा सखोल तपास करण्यात येत असल्याची माहिती पोलिसांनी दिली.
पुणे शहरात अलीकडेच विविध गुन्हेगारी टोळ्यांमधील संघर्षाच्या घटना समोर आल्या असताना शिरूरमधील या गोळीबारामुळे जिल्ह्यातील कायदा आणि सुव्यवस्थेचा प्रश्न पुन्हा चर्चेत आला आहे. गुन्हेगारी टोळ्यांच्या वाढत्या हालचालींबाबत नागरिकांमध्येही चिंता व्यक्त केली जात आहे.
दरम्यान, या घटनेनंतर करडे घाट परिसरात पोलिसांचा बंदोबस्त वाढवण्यात आला असून परिस्थिती नियंत्रणात असल्याचे सांगण्यात आले आहे. आरोपींचा शोध घेण्यासाठी विशेष पथके कामाला लागली असून लवकरच या प्रकरणाचा उलगडा होईल, असा विश्वास पोलिसांनी व्यक्त केला आहे.
