शिरूर: रांजणगाव एमआयडीसी (Shirur News) पोलीस ठाण्याच्या हद्दीतून शेतकऱ्यांकडील शेळी व बोकड चोरणाऱ्या टोळीतील दोन आरोपींना अटक केली. या (Pune Crime) कारवाईत आरोपींनी केलेल्या 5 गुन्ह्यांची उकल करण्यात पोलिसांना यश आले आहे. (Latest Marathi News)
गणेश कैलास ब्राम्हणे (वय-21) व सुनील अण्णाभाऊ माळी (वय -24, रा. दोघेही गव्हाणवाडी, ता. श्रीगोंदा, जि. अहिल्यानगर), अशी अटक करण्यात आलेल्या दोघांची नावे आहेत. त्यांना गव्हाणवाडी परिसरातून अटक केली. तपासात आरोपींनी बाभुळसर खुर्द, कर्डिलवाडी, वाघाळे, गणेगाव खालसा व शिरूर तालुका परिसरातून शेळी-बोकड चोरी केल्याची कबुली दिली.
पोलिसांनी दिलेल्या माहितीनुसार, रांजणगाव एमआयडीसी पोलीस ठाण्याच्या हद्दीतून शेतकऱ्यांच्या शेळी व बोकड चोरीच्या घटना घडत होत्या. याबाबत माणिक रामभाऊ काळे (रा. बाभुळसर खुर्द, ता. शिरूर) यांनी दिलेल्या फिर्यादीवरून मोटारसायकलवरून येणाऱ्या दोन अज्ञात चोरट्यांनी शेळी व बोकड चोरी केल्याची फिर्याद रांजणगाव एमआयडीसी पोलीस ठाण्यात दिली होती.
या गुन्ह्यांची गंभीर दखल घेत पोलीस निरीक्षक महादेव वाघमोडे यांनी तपास पथकाला गुन्हे उघडकीस आणण्याच्या सूचना दिल्या. पोलीस उपनिरीक्षक अविनाश थोरात, सहाय्यक फौजदार दत्तात्रय शिंदे, पोलीस अंमलदार उमेश कुतवळ, योगेश गुंड व किशोर शिवणकर यांच्या पथकाने तपास सुरू केला.
तपासादरम्यान शिरूर तालुका व अहिल्यानगर जिल्ह्यातील 150 हून अधिक सीसीटीव्ही फुटेज तपासण्यात आले तसेच तांत्रिक विश्लेषणाच्या आधारे आरोपींचा शोध घेण्यात आला. याच दरम्यान पोलीस अंमलदार योगेश गुंड यांना बातमीदारामार्फत माहिती मिळाली की, गव्हाणवाडी (ता. श्रीगोंदा) येथील दोन युवक मोटारसायकलवरून शेळी-बोकडे चोरून नेत आहेत.
त्यानुसार तपास पथकाने आरोपी गणेश ब्राम्हणे व सुनील माळी यांना गव्हाणवाडी परिसरातून अटक केली.आरोपींकडून 25 बोकडे, 01 शेळी तसेच गुन्ह्यात वापरलेली स्प्लेंडर मोटारसायकल असा एकूण अंदाजे 1 लाख 15 हजार रुपयांचा मुद्देमाल जप्त करण्यात आला आहे. आरोपींनी रांजणगाव एमआयडीसी पोलीस स्टेशन हद्दीत एकूण 05 गुन्हे केल्याची कबुली दिली आहे. जप्त केलेली शेळी-बोकडे संबंधित शेतकऱ्यांना परत देण्यात आल्याने शेतकऱ्यांनी समाधान व्यक्त केले आहे.
सदरची कामगिरी रांजणगाव एमआयडीसी पोलीस ठाण्याचे वरिष्ठ पोलीस निरीक्षक महादेव वाघमोडे पोलीस उपनिरिक्षक अविनाश थोरात, सहायक फौजदार दत्तात्रय शिंदे, पोलीस अंमलदार उमेश कुतवळ, योगेश गुंड, किशोर शिवणकर, नितिन भोस, संदिप जगदाळे, रामेश्वर वाहेकर यांनी केली आहे. सदर गुन्हयाचा पुढील तपास हवालदार नितिन भोस, संदिप जगदाळे, नितेश हुडे हे करीत आहे.
