पुणे: मालमत्ता गुन्हे विरोधी (Pune Crime) पथकाने उल्लेखनीय कामगिरी करत 1 कोटी 30 लाख रुपये किमतीची व्हेल माशाची उलटी, म्हणजेच अँबरग्रीस, तस्करी करणाऱ्या आरोपीला अटक केली आहे. जप्त करण्यात आलेल्या अँबरग्रीसचे वजन 1 किलो 380 ग्रॅम इतके आहे. (Latest Marathi News)
मालमत्ता गुन्हे विरोधी पथकातील पोलीस अंमलदार हर्षद कदम यांना मिळालेल्या गोपनीय माहितीनुसार ही कारवाई करण्यात आली. या माहितीच्या आधारे वरिष्ठ पोलीस निरीक्षक रावसाहेब मोटे, वरिष्ठ पोलीस निरीक्षक पांडुरंग देवकाते, पोलीस अंमलदार चंद्रकांत गडदे, विनोद वीर, हर्षद कदम, विशाल गायकवाड, सोमनाथ मोरे आणि औदुंबर रोंघे यांच्या पथकाने आळंदी पोलीस स्टेशन हद्दीतील घोलप वस्ती, मरकळ रोड, आळंदी, पुणे येथे सापळा रचला.
या कारवाईत शुभम पद्माकर अडगळे, वय 23 वर्षे, रा. घोलप वस्ती, आळंदी, पुणे याला ताब्यात घेण्यात आले. चौकशीत आरोपीकडे त्याचा साथीदार अक्षय वारणकर याच्याकडून विक्रीसाठी आणलेली 1 कोटी 30 लाख रुपये किमतीची 1 किलो 380 ग्रॅम वजनाची व्हेल माशाची उलटी आढळून आली. सदर मुद्देमाल तात्काळ जप्त करण्यात आला आहे.
या प्रकरणी आरोपीविरोधात आळंदी पोलीस स्टेशन येथे गुन्हा नोंद करण्यात आला असून, पुढील तपासासाठी आरोपीला आळंदी पोलीस स्टेशनच्या ताब्यात देण्यात आले आहे. ही कारवाई पिंपरी-चिंचवड गुन्हे शाखेच्या मालमत्ता गुन्हे विरोधी पथकाने केली आहे.
सदर कारवाईबाबत माहिती देताना मालमत्ता गुन्हे विरोधी पथकाचे अतिरिक्त कार्यभार असलेले वरिष्ठ पोलीस निरीक्षक विजय ढमाळ यांनी पथकाच्या कामगिरीचे कौतुक केले असून, अशा बेकायदेशीर तस्करीविरोधात कठोर कारवाई सुरूच राहणार असल्याचे स्पष्ट केले आहे.
