पुणे: पुणे (Pune News) महानगरपालिका निवडणुकीच्या तोंडावर शहरातील राजकीय वातावरणात मोठी उलथापालथ होण्याची शक्यता निर्माण झाली आहे. आगामी निवडणुकांमध्ये काँग्रेस आणि राष्ट्रवादी काँग्रेस एकत्र येऊन निवडणूक लढवणार का? याबाबत आता राजकीय वर्तुळात जोरदार चर्चा सुरू झाली आहे.
सूत्रांनी दिलेल्या माहितीनुसार, काँग्रेस नेते सतेज पाटील यांनी या संदर्भात चर्चा करण्यासाठी उपमुख्यमंत्री अजित पवार यांच्याशी फोनवरून संवाद साधला असून काँग्रेसकडून सध्या या पर्यायाविषयी विचार केला जात आहे. जरी सध्या राज्यात महायुतीचे सरकार असले, तरी पुणे महापालिकेत अजित पवार यांची मोठी ताकद असल्याने तिथे राष्ट्रवादी विरुद्ध भाजप-शिवसेना असा सामना रंगू शकतो, असे चित्र सध्या दिसत आहे.
या संभाव्य समीकरणांवर भाष्य करताना अजित पवार म्हणाले की, गेल्या 35 वर्षांपासून त्यांनी पुणे जिल्ह्यात काम केले आहे. नुकत्याच झालेल्या नगर परिषद निवडणुकीतही मतदारांनी दिलेला कौल सकारात्मक आहे. अजित पवार यांनी पुढे असेही नमूद केले की, पूर्वी महाविकास आघाडीमध्ये त्यांनी काँग्रेससोबत काम केले आहे. आगामी निवडणुकीत स्थानिक पातळीवर आघाडी करायची की नाही, याचा अंतिम अधिकार त्या त्या जिल्ह्यातील प्रमुखांना देण्यात आला आहे.
238 मतदारसंघांतील जिवाभावाच्या कार्यकर्त्यांच्या जोरावर यश मिळाले असल्याने, महापालिका निवडणुकीतही या कार्यकर्त्यांना डावलले जाणार नाही, याची काळजी घेतली जाईल असे त्यांनी स्पष्ट केले. दरम्यान, अजित पवार युतीबाबत काय निर्णय घेणार याकडे सर्वांचे लक्ष लागले आहेत.
