पुणे: पुण्यातील लोणीकंद परिसरातून माणुसकीला चटका लावणारी अत्यंत दुर्दैवी घटना समोर आली आहे. खेळण्या-बागडण्याच्या वयात एका 8 वर्षांच्या चिमुरडीचा कारखाली चिरडून अंत झाला. वढू खुर्द येथे शनिवारी रात्री घडलेल्या या घटनेने केवळ मजूर कुटुंबच नाही, तर संपूर्ण परिसर सुन्न झाला आहे.
मृत मुलीचे नाव मैराबी रसुलसाब बळीगर (वय 8) असे आहे. मैराबीचे आई-वडील पोटाची खळगी भरण्यासाठी कर्नाटकवरून पुण्यात आले असून, ते वढू खुर्द येथील एका इमारतीच्या बांधकामावर मजूर म्हणून काम करतात. दिवसभर राबराब राबल्यानंतर हे कुटुंब तेथीलच एका तात्पुरत्या पत्र्याच्या शेडमध्ये वास्तव्यास होते. शनिवारी रात्री गाढ झोपेत असलेल्या मैराबीला काळाने गाठले.
इमारतीच्या शेडमध्ये आरोपी कारचालक भरत रमेश नेहेते (वय 46) आपली कार पार्क करण्यासाठी आला. रात्रीचा अंधार आणि चालकाचा निष्काळजीपणा यामुळे शेडमध्ये एक लहान मुलगी झोपली आहे, हे त्याच्या लक्षात आले नाही. कार पार्क करण्याच्या नादात त्याने गाडी थेट झोपलेल्या मैराबीच्या अंगावर घातली. या भीषण अपघातात मैराबीचा मृत्यू झाला. लोणीकंद पोलिसांनी याप्रकरणी भरत नेहेते विरुद्ध गुन्हा दाखल केला असून पुढील तपास सुरू आहे.
