पुणे: आगामी (Pune News) महापालिका निवडणुकीच्या तोंडावर पुण्यात शिवसेनेच्या (ठाकरे गट) पक्ष संघटनेत मोठी गळती सुरू झाली होती. या निवडणुकीत वसंत मोरे हे एकटेच नाहीत, तर त्यांचा मुलगा रूपेश मोरे देखील यंदाच्या महापालिका निवडणुकीत पदार्पण करणार आहे. रूपेश मोरे याने सोशल मीडियावर पोस्ट करत याची घोषणा केली आहे. “आम्ही तयार आहोत पुन्हा एकदा जनतेच्या सेवेसाठी,” असे रूपेश मोरे याने आपल्या पोस्टमध्ये म्हटले आहे. मात्र, त्यानंतर ठाकरे गटाचे नेते वसंत मोरे यांची शिवसेनेच्या महापालिका निवडणूक समन्वयक प्रमुखपदी निवड करण्यात आली. या निवडीनंतर पुण्यात ठाकरे गटाचे वर्चस्व पुन्हा वाढल्याचे चित्र दिसत आहे. अशातच आता वसंत मोरे स्वतः पुन्हा एकदा महानगरपालिकेच्या निवडणुकीच्या रिंगणात उतरणार असल्याची माहिती समोर आली आहे.
कुठून लढणार बाप-लेक?
वसंत मोरे हे प्रभाग क्रमांक 38 इ मधून निवडणूक लढवणार आहेत, तर रूपेश मोरे प्रभाग क्रमांक 40 ड मधून निवडणुकीच्या रिंगणात उतरणार आहे. काही दिवसांपूर्वीच, ऐन दिवाळीच्या मुहूर्तावर मुलाच्या वाढदिवसाचे औचित्य साधत वसंत मोरे यांनी सोशल मीडियावर पोस्ट शेअर करत रूपेश मोरे महापालिका निवडणुकीत उभा राहणार असल्याचे जाहीर केले होते.
वसंत मोरे यांच्या राजकीय वाटचालीवर नजर टाकल्यास, त्यांच्या कारकिर्दीत अनेक चढ-उतार आले आहेत. मनसेच्या स्थानिक पदाधिकाऱ्यांशी मतभेद झाल्यानंतर त्यांनी मनसे पक्षाला सोडचिठ्ठी दिली होती. लोकसभा निवडणुकीच्या तोंडावर त्यांनी वंचित बहुजन आघाडीशी हातमिळवणी केली, मात्र त्यांना पराभवाला सामोरे जावे लागले. यानंतर विधानसभा निवडणुकीपूर्वी त्यांनी ठाकरे गटात (शिवसेना) प्रवेश केला. त्यांनी हडपसर मतदारसंघातून विधानसभा निवडणूक लढवली खरी, पण आमदार बनण्याचे त्यांचे स्वप्न पुन्हा एकदा अपुरे राहिले. या सर्व पार्श्वभूमीवर, आता ते पुन्हा एकदा महानगरपालिकेच्या निवडणुकीत जोरदार तयारी करत आहेत.
