पुणे: हडपसर ते सासवड दरम्यानच्या दिवेघाटात (Pune News) रस्ता रुंदीकरणासाठी ‘ब्लास्टिंग’ (खडक फोडण्याचे काम) करण्यात येणार असल्याने, आज दुपारी 1 ते 3 वाजेपर्यंत या मार्गावरील वाहतूक काही वेळासाठी बंद राहणार आहे. भारतीय राष्ट्रीय महामार्ग प्राधिकरणाने (NHAI) आता हा मार्ग अधिक प्रशस्त आणि सुरक्षित करण्याचा विडा उचलला आहे. याच रुंदीकरणाच्या कामाचा भाग म्हणून घाटातील कठीण खडक फोडण्यासाठी नियंत्रित स्फोट घडवून आणले जाणार आहेत. सुरक्षेच्या कारणास्तव, स्फोटाच्या वेळी आणि त्यानंतरचे काही तास रस्त्यावरील दगड-गोटे हटवण्यासाठी हा रस्ता बंद करण्यात आला आहे.
दिवेघाट हा पुणे आणि दक्षिण महाराष्ट्राला जोडणारा अत्यंत महत्त्वाचा दुवा आहे. मात्र, येथील तीव्र उतार आणि अरुंद, धोकादायक वळणांमुळे यापूर्वी अनेक भीषण अपघात झाले आहेत. दरम्यान, रस्ता रुंदीकरणाचे काम हाती घेण्यात आले आहे.
जर तुम्ही आज दुपारी 1 ते 3 या दरम्यान सासवड, जेजुरी किंवा पंढरपूरच्या दिशेने जाण्याचा विचार करत असाल, तर तुमचे नियोजन बदला. स्फोटाचे काम सुरू असताना घाटात कोणत्याही वाहनाला प्रवेश दिला जाणार नाही.
हे आहेत तुमचे पर्यायी मार्ग:
-
बोपदेव घाट: कोंढवामार्गे सासवडला जाण्यासाठी हा सर्वात सोयीचा पर्याय आहे.
-
लोणी काळभोर-फुरसुंगी मार्ग: हडपसरमधील गर्दी टाळण्यासाठी सोलापूर महामार्गावरून लोणी काळभोरमार्गे सासवडकडे वळता येईल.
भविष्यात पालखी महामार्ग चकाचक आणि रुंद होणार आहे. यामुळे दरवर्षी आषाढी वारीत होणारी वाहतूक कोंडी फुटणार असून, दिवेघाटातील प्रवासाचा वेळ 15 ते 20 मिनिटांनी कमी होणार आहे.
