पुणे : पुण्यात विवाहित महिलांच्या छळाच्या घटनांमध्ये वाढ होत असून आणखी एक धक्कादायक प्रकार समोर आला आहे. लग्नात अपेक्षेप्रमाणे पाहुणचार झाला नाही, तसेच हुंड्यामध्ये महागड्या वस्तू मिळाल्या नाहीत, अशा कारणांवरून विवाहितेचा सासरच्या मंडळींकडून छळ केल्याचा आरोप करण्यात आला आहे. याच प्रकरणात पतीने पत्नीच्या चारित्र्यावर संशय घेत तिला मारहाण केल्याचीही तक्रार पोलिसांकडे दाखल झाली आहे.
सर्वात गंभीर बाब म्हणजे पीडिता गरोदर असतानाही तिच्यावर कथितपणे दबाव टाकण्यात आला. सासरच्या मंडळींनी तिला जबरदस्तीने डेटॉल पाजल्याचा आरोप तिने केला आहे. या प्रकारामुळे परिसरात संताप व्यक्त होत असून, पोलिसांनी तक्रारीची गंभीर दखल घेत संबंधितांविरोधात गुन्हा दाखल केला आहे.
या प्रकरणातील पीडित 22 वर्षीय विवाहितेने काळेपडळ पोलीस ठाण्यात तक्रार नोंदवली. तक्रारीनुसार, पती तिच्या चारित्र्यावर संशय घेत होता. या संशयातून तिच्याशी वारंवार वाद घालून तिला मारहाण करण्यात येत असल्याचे तिने पोलिसांना सांगितले.
लग्नानंतर सासरच्या मंडळींकडून विविध कारणांवरून मानसिक आणि शारीरिक त्रास दिला जात असल्याचा आरोपही तक्रारीत करण्यात आला आहे. हुंड्यात अपेक्षित वस्तू मिळाल्या नाहीत आणि लग्नावेळी योग्य पाहुणचार झाला नाही, असे सांगत तिच्यावर दबाव टाकला जात असल्याचे समोर आले आहे. याप्रकरणी काळेपडळ पोलिसांनी पती प्रतीक पिंगळे (वय 27) आणि सासू वंदना सुनील पिंगळे (वय 45, दोघे रा. अक्कलकोट) यांच्याविरोधात गुन्हा दाखल केला असून आणखी तपास सुरु आहे.
