पुणे : आरक्षणाच्या उपवर्गीकरणाला विरोध करण्यासाठी पुण्यात शनिवारी महामोर्चा काढण्यात येणार आहे. या आंदोलनाचा परिणाम शहरातील वाहतुकीवर होऊ नये यासाठी वाहतूक पोलिसांनी काही मार्गांवर बदल करण्याचा निर्णय घेतला आहे. बंडगार्डन, पुणे स्टेशन आणि जिल्हाधिकारी कार्यालय परिसरात वाहनांची मोठी गर्दी होण्याची शक्यता आहे.
शनिवारी सकाळी 11 वाजल्यापासून मोर्चा पूर्ण होईपर्यंत वाहतुकीचे हे नियोजन लागू राहणार आहे. शाहीर अमर शेख चौकापासून सुरू होणारा मोर्चा जिल्हाधिकारी कार्यालयाच्या दिशेने जाणार आहे. या मार्गावर वाहतुकीचा ताण वाढण्याची शक्यता असल्याने नागरिकांनी शक्य असल्यास पर्यायी रस्त्यांचा वापर करावा, असे आवाहन करण्यात आले आहे.
‘या’ भागात पार्किंग करता येणार नाही
मोर्चाच्या काळात गर्दी आणि सुरक्षेचा विचार करून काही रस्त्यांवर वाहन उभे करण्यास मनाई करण्यात आली आहे. मालधक्का चौक, बोल्हाई चौक-पुणे स्टेशन रस्ता, साधू वासवाणी चौक, जीपीओ चौक, नरपतगिरी चौक, फोटोझिंको प्रेस परिसर आणि डॉ. बॅनर्जी चौक या ठिकाणी पार्किंग टाळावे लागणार आहे.
कोणता मार्ग वापरावा?
शाहीर अमर शेख चौकाकडून मालधक्का चौकाच्या दिशेने जाणाऱ्या वाहनांना आरटीओ चौक आणि जहांगीर चौकाच्या बाजूने पुढे पाठवले जाणार आहे. आरटीओ चौकातून जहांगीर चौक किंवा शाहीर अमर शेख चौकाकडे जाणाऱ्यांना कुंभारवेस मार्गाचा पर्याय राहणार आहे.
जीपीओ चौकातून बोल्हाई किंवा मालधक्का चौकाकडे जाणाऱ्या वाहनांसाठी किराड चौक आणि नेहरू मेमोरियल चौक हा पर्यायी मार्ग असेल. पुणे स्टेशनहून मालधक्का चौकाकडे जाणाऱ्या चालकांनी अलंकार चौकातून जाणे अपेक्षित आहे.
नरपतगिरी चौकातून मालधक्क्याकडे जाणारी वाहने 15 ऑगस्ट चौक, कमला नेहरू हॉस्पिटल, पवळे चौक आणि कुंभारवेस चौक या मार्गाने वळवली जाणार आहेत. बॅनर्जी चौकातून शाहीर अमर शेख चौकाकडे जाणाऱ्या वाहनांसाठीही याच मार्गाचा वापर केला जाणार आहे.
दरम्यान, वाहतूक बदलांच्या काळात रुग्णवाहिका, अग्निशमन वाहने आणि अन्य अत्यावश्यक सेवेच्या वाहनांना अडथळा येऊ नये याची विशेष व्यवस्था करण्यात येणार आहे. नागरिकांनी घराबाहेर पडण्यापूर्वी मार्गाची माहिती घेऊन प्रवासाचे नियोजन करावे.
