ओमकार भोरडे
शिरूर: शनिवारी भरणाऱ्या शिरूर मार्केट यार्डच्या आठवडे बाजारात चोरीच्या घटना टाळण्यासाठी व वाहतूक सुरळीत ठेवण्यासाठी शिरूर पोलिसांनी विशेष बंदोबस्त ठेवला होता. यावेळी नागरिकांशी संवाद साधून त्यांच्या समस्या देखील जाणून घेतल्या.
बाजारात मोठी गर्दी, पोलिसांचा कडक बंदोबस्त
दि. 20 जून रोजी सकाळी 10:30 ते 11:00 वा. दरम्यान शिरूर पोलीस स्टेशन हद्दीतील मार्केट यार्ड येथील आठवडे बाजाराला भेट देण्यात आली. शिरूर शहर व पंचक्रोशीतील नागरिकांसह अहिल्यानगर जिल्ह्यातील श्रीगोंदा व पारनेर तालुक्यातील शेतकरी मोठ्या संख्येने भाजीपाला, किराणा व जीवनावश्यक वस्तूंच्या खरेदी-विक्रीसाठी येथे येतात. त्यामुळे बाजारात मोठी गर्दी असते.
मोबाईल चोरी, दागिने चोरी व इतर मालमत्तेविरुद्धचे गुन्हे घडण्याची शक्यता लक्षात घेऊन पोलीस अधिकारी व अंमलदारांनी बाजार परिसरात मोठ्या प्रमाणावर पेट्रोलिंग केले. यावेळी उपस्थित शेतकरी व नागरिकांशी संवाद साधून त्यांच्या अडीअडचणी समजून घेतल्या. प्राप्त सूचना व समस्या याबत उपाययोजना करण्यासाठी मार्केट यार्ड, शिरूर यांच्या कार्यालयास लेखी पत्र देण्यात येणार आहे.
वाहतूक कोंडीवर उपाय व नाकाबंदी
बाजाराच्या दिवशी वाहनांची संख्या वाढल्याने होणारी वाहतूक कोंडी व पार्किंग व्यवस्थापन याबत शिरूर नगरपालिकेशी समन्वय साधून उपाययोजनांवर सल्लामसलत सुरू आहे. याच भाग म्हणून सकाळी 11:00 ते 11:30 वा. दरम्यान पाबळ फाटा चौक व एसटी स्टँड चौक, शिरूर येथे नाकाबंदी करण्यात आली.
नाकाबंदी दरम्यान गाड्यांवर ब्लॅक फिल्म लावणारे वाहनचालक, नंबर प्लेट नसलेल्या गाड्या, ड्रायव्हिंग लायसन्स नसले चालक आणि इतर वाहतूक नियम मोडणारे अशा वाहनचालकांवर मोटार वाहन कायद्यान्वये कायदेशीर कारवाई करण्यात आली.
नागरिकांनी बाजारात येताना आपला मोबाईल, पाकीट व दागिने सांभाळण्याचे आवाहन पोलिस निरिक्षक विनोद पाटील यांनी केले आहे. तसेच वाहतुकीचे नियम पाळून सहकार्य करण्याची विनंती केली आहे.
