राहुलकुमार अवचट
यवत: यवत पोलीस स्टेशन अंतर्गत दापोडी गावच्या हद्दीतील लिंगमाळ परिसरात, अजित महादेव मासाळ हा घरच्या आडोशाला बेकायदेशीरपणे गावठी हातभट्टीची तयार दारू विक्री करत होता. या व्यक्तीवर यवत पोलीस ठाण्यामध्ये एकूण ६ गुन्हे दाखल असूनही तो गावठी हातभट्टीची तयार दारू विक्री करत होता.
परिसरातील गुन्हेगारी कृत्यांना आळा घालणे, सार्वजनिक सुव्यवस्था व नागरिकांच्या आरोग्याच्या दृष्टीकोनातून यावर प्रभावी प्रतिबंधक कारवाई करणे अत्यंत आवश्यक असल्याने, अजित महादेव मासाळ याच्यावर विघातक कृत्यांना प्रतिबंध करण्याच्या विषयातील महाराष्ट्र झोपडपट्टी दादा, हातभट्टीवाले, औषधोपचार करणारे, धोकादायक व्यक्ती, व्हिडिओ आणि ऑडिओ लाटणारे यांच्या विघातक कृत्यांना प्रतिबंध करण्याबाबतचा महाराष्ट्र अधिनियम, १९८१ (सुधारणा २०२५) च्या महाराष्ट्र अधिनियम क्रमांक २९ चे कलम ३ (१) प्रमाणे ‘हातभट्टीवाला’ या सदराखाली स्थानबद्ध करण्याबाबत जिल्हाधिकारी, पुणे यांच्या आदेशानुसार अजित महादेव मासाळ (वय ३७ वर्षे, रा. दापोडी, लिंगमाळ, ता. दौंड, जि. पुणे) यास १ वर्षाकरिता स्थानबद्ध करून मध्यवर्ती कारागृह, अमरावती, जि. अमरावती येथे ठेवण्यात आले आहे.
सदर कारवाई पुणे ग्रामीणचे पोलीस अधीक्षक संदीपसिंह गिल, बारामती अप्पर पोलीस अधीक्षक गणेश बिरादार, दौंड उपविभागीय पोलीस अधिकारी बापूराव दडस यांच्या मार्गदर्शनाखाली यवत पोलीस स्टेशनचे पोलीस निरीक्षक संतोष तासगावकर, पोलीस उपनिरीक्षक किशोर वागज, पोलीस उपनिरीक्षक सागर माने, पोलीस हवालदार नारायण वलेकर, प्रमोद गायकवाड, परशुराम म्हस्के, मेघराज जगताप, संदीप करे, अमोल काळे, अमोल भुजबळ, प्रतीक धिवार, दादा जाधव यांच्या पथकाने केली.
