अक्षय टेमगिरे
रांजणगाव : रांजणगाव एमआयडीसी परिसरात उद्योगांना सुरक्षित, भयमुक्त आणि विश्वासार्ह वातावरण उपलब्ध करून देण्याच्या उद्देशाने रांजणगाव एमआयडीसी पोलीस स्टेशनच्या वतीने रिया मीटिंग हॉल येथे विविध कंपन्यांच्या एचआर मॅनेजर्स व प्रतिनिधींची समन्वय बैठक उत्साहात पार पडली आहे.
पोलीस निरीक्षक कुमार कदम यांनी बैठकीत स्पष्ट इशारा देत सांगितले की, एमआयडीसीतील कंपन्यांना धमकावून कॉन्ट्रॅक्ट मिळविण्याचा प्रयत्न करणारे, खंडणी वसूल करणारे किंवा दादागिरी करणाऱ्यांविरुद्ध कठोर कायदेशीर कारवाई करण्यात येईल.
औद्योगिक शांतता अबाधित ठेवण्यासाठी पोलीस प्रशासन कोणतीही तडजोड करणार नसल्याचे त्यांनी स्पष्ट केले असून. याशिवाय, कंपन्यांमध्ये कार्यरत महिला कर्मचाऱ्यांच्या सुरक्षेला सर्वोच्च प्राधान्य देण्यात येणार असून, महिला छेडछाड, विनयभंग अथवा इतर अत्याचार करणाऱ्यांविरुद्ध कठोर कारवाई केली जाईल, असेही त्यांनी सांगितले आहे.
बैठकीत महिला सुरक्षा, सायबर गुन्हे प्रतिबंध, कामगार व वसाहतींची पडताळणी, वाहतूक समस्या, कॉन्ट्रॅक्ट वाद, खंडणीसारख्या गुन्ह्यांचा प्रतिबंध तसेच कायदा व सुव्यवस्था राखण्यासाठी पोलीस प्रशासन व उद्योग क्षेत्रातील प्रतिनिधींमध्ये प्रभावी समन्वय वाढविण्याबाबत सविस्तर मार्गदर्शन करण्यात आले आहे.
यावेळी एमआयडीसी परिसरातील विविध कंपन्यांना भेडसावणाऱ्या अडचणी व समस्या जाणून घेण्यात आल्या. त्या सोडविण्यासाठी आवश्यक ती कार्यवाही करण्यात येईल आणि पोलीस प्रशासनाकडून सर्वतोपरी सहकार्य केले जाईल, असे आश्वासन देण्यात आले असून.
या बैठकीस रांजणगाव एमआयडीसी पोलीस स्टेशनचे पोलीस निरीक्षक कुमार कदम, रांजणगाव इंडस्ट्रियल असोसिएशनचे अध्यक्ष महेंद्र पाटील, सदस्य मेहराम, पोलीस हवालदार ब्रम्हा पोवार, रियाचे प्रतिनिधी तसेच एमआयडीसीतील विविध कंपन्यांचे एचआर मॅनेजर्स व प्रतिनिधी मोठ्या संख्येने उपस्थित होते.
उपस्थितांनी पोलीस प्रशासनाच्या या पुढाकाराचे स्वागत करत उद्योग क्षेत्र आणि पोलीस यांच्यातील समन्वय अधिक बळकट करण्याचा विश्वास व्यक्त केला आहे.
