पुणे: पुण्यातील कात्रज परिसरात सुरू असलेल्या एका हायप्रोफाईल वेश्याव्यवसायाचा भारती विद्यापीठ पोलिसांनी पर्दाफाश केला आहे. शहरातील ‘किनारा लॉज’वर पोलिसांनी अचानक धाड टाकून दोन पीडित तरुणींची सुटका केली आहे. या धक्कादायक प्रकारामुळे परिसरात मोठी खळबळ उडाली असून, मानवी तस्करीचे एक मोठे रॅकेट उघड झाले आहे.
मिळालेल्या गोपनीय माहितीनुसार, कात्रज येथील एका लॉजवर परराज्यातील तरुणींना डांबून ठेवून त्यांच्याकडून वेश्याव्यवसाय करून घेतला जात होता. आरोपी हे अत्यंत शिताफीने व्हॉट्सअॅपचा वापर करून ग्राहकांना आकर्षित करत होते. ते ग्राहकांना व्हॉट्सअॅपवर तरुणींचे फोटो पाठवून सौदा ठरवत असत आणि त्यानंतर त्यांना लॉजवर बोलावले जात असे. या काळ्या धंद्याची माहिती मिळताच पोलिसांनी कारवाईची योजना आखली.
या कारवाईसाठी पोलिसांनी एक बनावट ग्राहक बनून दलालाशी संपर्क साधला. व्हॉट्सअॅपवर डील पक्की झाल्यानंतर, तो ग्राहक किनारा लॉजवर पोहोचला. तिथे आरोपीने तरुणींची भेट घालून देताच, ग्राहकाने पोलिसांना इशारा केला. यानंतर भारती विद्यापीठ पोलीस पथकाने तातडीने किनारा लॉजवर छापेमारी केली. या कारवाईत पोलिसांनी परराज्यातून आलेल्या दोन पीडित तरुणींची सुखरूप सुटका केली आहे.
या प्रकरणात पोलिसांनी तुकाराम दत्ता मनाळे (वय 22) या दलालाला अटक केली आहे. मूळचा लातूर जिल्ह्यातील किल्लारी येथील असलेला आरोपी सध्या पुण्याच्या धनकवडी भागात राहत होता. त्याच्याविरुद्ध अनैतिक मानवी वाहतूक प्रतिबंधक कायद्यान्वये गुन्हा दाखल करण्यात आला आहे.
