पुणे : स्वतःला देवाचा अवतार सांगून हजारो भाविकांची फसवणूक करणाऱ्या अशोक एकनाथ खरात उर्फ ‘कॅप्टन भोंदू बाबा’च्या अडचणीत वाढ झाली आहे. अंमलबजावणी संचालनालयाने (ईडी) त्याच्याविरुद्ध 42.88 कोटी रुपयांच्या कथित मनी लॉन्डरिंग प्रकरणात विशेष पीएमएलए न्यायालयात तब्बल 3 हजार पानांचे भव्य आरोपपत्र दाखल केले आहे. या गुन्ह्यात केवळ अशोक खरातच नाही, तर त्याची पत्नी कल्पना खरात आणि इतर 4 जणांनाही आरोपी करण्यात आले आहे.
ईडीच्या तपासातून समोर आले आहे की, खरातने लोकांच्या धार्मिक भावनांचा गैरफायदा घेत मोठी माया गोळा केली. आजारपण, व्यवसायातील तोटा आणि कौटुंबिक अडचणी दूर करण्याचे आमिष दाखवून तो ‘अवतार पूजा’ व विशेष विधींच्या नावाखाली पैसे उकळायचा. विशेषतः श्रीमंत व्यावसायिकांना कुटुंबाच्या सुरक्षेची भीती दाखवून लुटले गेले. चमत्काराचा खोटा आभास निर्माण करण्यासाठी रिमोट कंट्रोलवर चालणारे बनावट साप, वाघाची कातडी अशा वस्तू वापरल्या जात होत्या. तसेच, महिला भाविकांना गुंगीचे औषध देणे आणि चिंचेच्या बिया, दगड व मध यांना ‘चमत्कारिक औषध’ म्हणून विकण्याचे गंभीर आरोपही त्याच्यावर आहेत.
मिळालेला काळा पैसा पांढरा करण्यासाठी खरातने विविध सहकारी पतसंस्थांचा वापर केला. राहाता येथील समता पतसंस्थेत 108 आणि सिन्नरच्या जगदंबा माता पतसंस्थेत 34 बेनामी खाती सापडली आहेत. या पैशांमधून नाशिक, पुणे, मुंबई, अहमदनगर आणि सोलापूर येथे मोठ्या प्रमाणावर मालमत्ता खरेदी करण्यात आल्या.
ईडीने केलेल्या कारवाईत आतापर्यंत खालील मुद्दे समोर आले आहेत:
जप्त रोकड व दागिने: 13.92 कोटी रुपयांची रोकड, 5.18 लाखांचे विदेशी चलन आणि 1.12 कोटींचे सोने-चांदी.
बँक ठेवी व वाहने: 2.60 कोटी रुपयांच्या बँक ठेवी आणि एक आलिशान मर्सिडीज-बेंझ कार.
एकूण जप्ती: 17.70 कोटींची जंगम आणि 19.20 कोटींची स्थावर मालमत्ता तात्पुरती जप्त करण्यात आली आहे.
या प्रकरणात ईडीने 37 साक्षीदारांचे जबाब आणि भक्कम डिजिटल पुरावे न्यायालयासमोर सादर केले असून, पुढील सुनावणीकडे सर्वांचे लक्ष लागले आहे
