पुणे : कमी कालावधीत गुंतवणुकीवर भरघोस नफा मिळवण्याचे आमिष दाखवून सायबर चोरट्यांनी पुण्यातील एका 70 वर्षीय ज्येष्ठ नागरिकाची तब्बल 2 कोटी 10 लाख रुपयांची फसवणूक केली आहे. सोशल मीडियावरील बनावट जाहिरातीच्या माध्यमातून आरोपींनी त्यांच्याशी संपर्क साधला. सुरुवातीला चांगला परतावा देऊन विश्वास संपादन केला. त्यानंतर मुंबई क्राइम ब्रँच आणि ईडीच्या कारवाईची भीती दाखवून कोट्यवधी रुपये उकळले. या प्रकरणी पुणे सायबर पोलीस ठाण्यात गुन्हा दाखल करण्यात आला आहे.
फसवणूक झालेले ज्येष्ठ नागरिक मुंढवा परिसरात एकटे राहतात. सोशल मीडियावर त्यांना गुंतवणुकीची जाहिरात दिसली होती. या जाहिरातीत प्रसिद्ध उद्योगपती, केंद्रीय मंत्री आणि खेळाडूंचे फोटो वापरले होते. त्यामुळे त्यांनी जाहिरातीतील क्रमांकावर संपर्क साधला. संबंधित व्यक्तीने कंपनी ब्रिटनमधील असल्याचे सांगत 20 हजार रुपये गुंतवल्यास आठवडाभरात चारपट रक्कम मिळेल, असे आश्वासन दिले. त्यांनी पैसे भरल्यानंतर खात्यात 80 हजार रुपये जमा झाल्याचे दिसले. त्यामुळे त्यांचा विश्वास वाढला.
यानंतर आरोपींनी मोठ्या रकमा गुंतवण्याचा आग्रह धरला. सुरुवातीला 5 लाख रुपये आणि पुढे आणखी पैसे जमा करण्यास सांगितले. एका टप्प्यावर ज्येष्ठ नागरिकांनी 1 कोटी 7 लाख रुपये पाठवले. त्यांच्या ऑनलाइन खात्यात गुंतवणुकीची रक्कम वाढून 2 कोटी 80 लाख रुपये झाल्याचे दाखवण्यात आले. मात्र, पैसे काढण्याचा प्रयत्न केल्यावर त्यांना रक्कम मिळाली नाही.
दरम्यान, 2 जुलै रोजी एका व्यक्तीने फोन करून आपण ट्रायचा अधिकारी असल्याचे सांगितले. मोबाइल क्रमांकाचा गुन्ह्यात वापर झाल्याचा आरोप करत मुंबई क्राइम ब्रँच आणि ईडीकडून अटक होऊ शकते, अशी भीती दाखवली. मनी लाँड्रिंगच्या चौकशीसाठी पैसे जमा करावे लागतील आणि तपासानंतर ते परत मिळतील, असे सांगण्यात आले. अटकेच्या भीतीने त्यांनी 8 ते 15 जुलैदरम्यान आणखी 1 कोटी 4 लाख रुपये पाठवले. त्यानंतर आरोपींनी संपर्क बंद केला. फसवणूक झाल्याचे लक्षात येताच त्यांनी पोलिसांकडे धाव घेतली.
