पुणे : दिवाळीच्या सणात मिठाई खरेदी करताना नागरिकांच्या आरोग्याला धोका निर्माण होऊ नये, यासाठी अन्न व औषध प्रशासनाने (FDA) तपासणी मोहीम सुरू केली आहे. या मोहिमेदरम्यान पुणे शहर आणि जिल्ह्यातील 2 मिठाई विक्रेत्यांवर कारवाई करण्यात आली. कोंढवा बुद्रुक आणि आळंदी परिसरात मिळून तब्बल 1,491 किलो मिठाईचा साठा जप्त करून नष्ट करण्यात आला. या मिठाईची अंदाजे किंमत 2 लाख 94 हजार 900 रुपये असल्याची माहिती प्रशासनाने दिली.
पहिली कारवाई कोंढवा बुद्रुकमधील टिळेकर नगर येथील गायत्री लाडू भांडारमध्ये करण्यात आली. अन्न सुरक्षा अधिकारी के. व्ही. बारवकर यांच्या पथकाने दुकानाची तपासणी केली. यावेळी 1,008 किलो मोतीचूर लाडू आणि 180 किलो मोतीचूर बुंदी असा एकूण 1,188 किलो साठा आढळला. या मिठाईची किंमत सुमारे 1 लाख 73 हजार रुपये होती. तपासणीनंतर हा संपूर्ण साठा नष्ट करण्यात आला. तसेच संबंधित विक्रेत्याचा अन्न परवानाही तातडीने निलंबित करण्यात आला.
दुसरी कारवाई 2 नोव्हेंबर रोजी आळंदी-मरकळ रोडवरील धानोरे येथील आर. बिकानेर मिठाई केंद्रात करण्यात आली. येथे 1 लाख 21 हजार 200 रुपये किमतीची 303 किलो बर्फी आढळली. हा साठा निकृष्ट दर्जाचा होता. त्यावर आवश्यक लेबल नव्हते आणि खरेदीची बिलेही उपलब्ध नव्हती. त्यामुळे प्रशासनाने बर्फी जप्त करून जागेवरच नष्ट केली. याशिवाय कलाकंदाचा नमुनाही प्रयोगशाळेतील तपासणीसाठी पाठवण्यात आला आहे.
ही कारवाई एफडीएचे सहआयुक्त श्रीकांत करकळे यांच्या मार्गदर्शनाखाली करण्यात आली. अन्न सुरक्षा अधिकारी एच. आर. मारेवार आणि एस. एन. चट्टे यांनी तपासणीत सहभाग घेतला. मिठाई विक्रेत्यांनी पदार्थांची योग्य साठवणूक करावी, पॅकिंगवर आवश्यक माहिती द्यावी आणि खरेदीची बिले जतन करावीत, असे आवाहन प्रशासनाने केले आहे.
