आदित्य बोराटे
इंदापूर: प्रतिबंधित गुटख्याची बेकायदा वाहतूक करणाऱ्या पिकअप वाहनावर इंदापूर पोलिसांनी धडक कारवाई केली. या कारवाईत १५ लाख ८७ हजार ६४० रुपयांचा विमल गुटखा आणि ८ लाख रुपये किमतीचे पिकअप वाहन, असा एकूण २३ लाख ८७ हजार ६४० रुपये किमतीचा मुद्देमाल हस्तगत करण्यात आला. याप्रकरणी वाहनचालक आजमखान महमूद पठाण (रा. सरस्वतीनगर, इंदापूर) याला अटक करण्यात आली आहे.
पोलिसांनी दिलेल्या माहितीनुसार,जिल्ह्यात प्रतिबंधित गुटख्याची विक्री व वाहतुकीविरोधात कारवाई करण्याच्या सूचना वरिष्ठ पोलिस अधिकाऱ्यांनी दिल्या आहेत. त्यानुसार इंदापूर पोलिस ठाण्याचे प्रभारी अधिकारी विलास नाळे यांच्या मार्गदर्शनाखाली पोलिस पथकाकडून कारवाई करण्यात आली.
दरम्यान, २० ऑगस्ट रोजी मध्यरात्री सहायक फौजदार प्रकाश माने यांना पिकअप वाहनातून मोठ्या प्रमाणात गुटख्याची वाहतूक होणार असल्याची गोपनीय माहिती मिळाली. त्यानुसार पोलिस उपनिरीक्षक हनुमंत वाघमारे व विजय कोल्हे यांच्या मार्गदर्शनाखाली पोलिस पथकाने हायवे मार्गावर वाहनांची तपासणी सुरू केली.
बावड्याकडून येणाऱ्या एमएच ४२ BU १०२९ क्रमांकाच्या पिकअप वाहनावर पोलिसांना संशय आला. पोलिसांनी वाहन थांबवून तपासणी केली असता त्याच्या हौद्यात मागील बाजूस रिकामे कॅरेट लावलेले आढळले. त्याची तपासणी केली असता त्यामध्ये मोठ्या प्रमाणात विमल गुटख्याचा साठा आढळून आला.
पोलिसांनी १५ लाख ८७ हजार ६४० रुपयांचा गुटखा व ८ लाख रुपये किमतीचे पिकअप वाहन, असा एकूण २३ लाख ८७ हजार ६४० रुपयांचा मुद्देमाल जप्त केला. हा गुटखा कर्नाटकातील तिकोटा येथून कमलेश नामक व्यक्तीकडून विक्रीसाठी आणण्यात येत असल्याची माहिती तपासात समोर आली.
या कारवाईची माहिती अन्न व औषध प्रशासन विभागाला देण्यात आली. संबंधित अधिकाऱ्यांनी घटनास्थळी येऊन गुटख्याची पाहणी केली. त्यानंतर याप्रकरणी संबंधितांविरुद्ध गुन्हा दाखल करण्यात आला आहे.
याप्रकरणी वाहनचालक आजमखान पठाण याला अटक करण्यात आली असून, पुढील तपास पोलिस उपनिरीक्षक हनुमंत वाघमारे व पोलिस कॉन्स्टेबल हसीम मुलाणी करीत आहेत.
सदरची ही कारवाई अप्पर पोलीस अधीक्षक गणेश बिरादार, उपविभागीय पोलीस अधिकारी चेतन्य कदम, इंदापूर पोलीस ठाण्याचे पोलीस निरीक्षक विलास नाळे यांच्या मार्गदर्शनाखाली सहायक फौजदार प्रकाश माने, पोलिस हवालदार सलमान खान, सुकुमार भोसले, पोलिस कॉन्स्टेबल गणेश मुंडे, महेश माने, सचिन शिंदे, प्रशांत साळवे, राहुल उदागे, वेदांत कोळी,वैभव गरड यांनी केली आहे.
