पुणे: मुळशी परिसरातील दुधाळे वस्ती येथून बेपत्ता झालेल्या 26 वर्षीय तरुणाचा मृतदेह तळ्यात आढळल्याने परिसरात खळबळ उडाली आहे. या प्रकरणाचा तपास करत बावधन पोलिसांनी एका संशयिताला अटक केली आहे. मृत तरुणाचे नाव महेंद्रकुमार ओमप्रकाश बंजारे असून तो मूळचा छत्तीसगड येथील रहिवासी होता. 30 ऑगस्टच्या रात्री तो दुधाळे वस्ती येथील घरातून बाहेर गेला होता. त्यानंतर तो घरी परतला नाही. बराच वेळ संपर्क न झाल्याने त्याच्या 22 वर्षीय पत्नीने पोलिसांकडे बेपत्ता झाल्याची तक्रार दाखल केली होती.
दरम्यान, 2 सप्टेंबर रोजी लवळे येथील शेडगेवस्ती परिसरातील तळजाईदेवी मंदिराजवळील तलावात एका तरुणाचा मृतदेह आढळून आला. माहिती मिळताच पोलिसांनी घटनास्थळी पोहोचून मृतदेह पाण्यातून बाहेर काढला. तपासणीदरम्यान मृताच्या हात-पायांना कपड्याने बांधल्याचे आणि पायाला वजनदार दगड लावल्याचे पोलिसांच्या निदर्शनास आले.
मृतदेहाची ओळख महेंद्रकुमार बंजारे अशी झाल्यानंतर पोलिसांनी हत्येच्या दिशेने तपास सुरू केला. तपासात लुटमारीच्या उद्देशाने ही घटना घडल्याचा संशय व्यक्त करण्यात आला आहे. पोलिसांनी गोपाल उर्फ राज साधन बिस्वास, वय 20, रा. गाझीपूर, दिल्ली, याला अटक केली आहे. दरम्यान, या प्रकरणातील आणखी एका व्यक्तीचा शोध सुरू आहे.
या प्रकरणातील लुटीची रक्कम, हत्येचा नेमका घटनाक्रम आणि दुसऱ्या संशयिताची भूमिका याबाबत तपास सुरू आहे. आरोपीला न्यायालयात हजर केल्यानंतर त्याला 19 सप्टेंबरपर्यंत पोलीस कोठडी सुनावण्यात आली आहे. पुढील तपास बावधन पोलीस करत आहेत.
