हडपसर, ता. २४ : रॅपिडो अॅपवरील भाडे आणि मीटरनुसार आकारल्या जाणाऱ्या शुल्कावरून झालेल्या वादातून कॅब चालकाला मारहाण करून गंभीर जखमी केल्याची घटना हडपसरमधील अॅमनोरा पार्कटाऊन परिसरात मंगळवारी (दि. २३) दुपारी एकच्या सुमारास घडली. या मारहाणीत चालकाच्या उजव्या हाताच्या मनगटाला फ्रॅक्चर झाले असून हडपसर पोलिसांनी तिघांविरोधात गुन्हा दाखल केला आहे.
लखन धनंजय भारती (वय २७, रा. मांजरी बुद्रुक) असे जखमी झालेल्या चालकाचे नाव आहे. शुभदा ताटे, किरण ताटे आणि ध्रुव ताटे (रा. ट्रेन्डी टॉवर, अॅमनोरा पार्कटाऊन, हडपसर) या तिघांवर गुन्हा दाखल करण्यात आला आहे.
पोलिसांनी दिलेल्या माहितीनुसार, लखन भारती हे रॅपिडो कंपनीसाठी कॅब चालक म्हणून काम करतात. मंगळवारी दुपारीच्या सुमारास त्यांना अॅमनोरा पार्कटाऊन येथून शिवाजीनगरसाठी बुकिंग मिळाले. ट्रेन्डी टॉवरसमोर पोहोचल्यानंतर प्रवासी शुभदा ताटे, त्यांचे पती किरण ताटे आणि मुलगा ध्रुव ताटे हे कॅबमध्ये बसले. चालकाने मीटरप्रमाणे भाडे आकारले जाईल, असे सांगितल्यावर प्रवाशांनी अॅपमध्ये दाखविलेल्या रकमेप्रमाणेच पैसे देणार असल्याचे सांगितले.
यावरून वाद निर्माण झाला आणि त्यांनी पहिली कॅब रद्द केली. त्यानंतर दुसरी कॅब बुक करण्यात आली. मात्र, त्या चालकानेही मीटरनुसारच भाडे आकारण्याची भूमिका घेतल्याने दुसरी कॅबही रद्द करण्यात आली. याच कारणावरून संतप्त झालेल्या शुभदा ताटे, किरण ताटे आणि ध्रुव ताटे यांनी लखन भारती यांना शिवीगाळ करत लाथाबुक्क्यांनी मारहाण केल्याचा आरोप करण्यात आला आहे.
या मारहाणीमध्ये त्यांना रस्त्यावरील सिमेंटच्या डिव्हायडरवर पाडण्यात आले. यात त्यांच्या उजव्या हाताच्या मनगटाला गंभीर दुखापत होऊन फ्रॅक्चर झाले, तसेच नाकालाही मार लागला. घटनेनंतर पोलिसांनी जखमी चालकाला उपचारासाठी ससून रुग्णालयात पाठविले. लखन भारती यांच्या फिर्यादीवरून हडपसर पोलिसांनी शुभदा ताटे, किरण ताटे आणि ध्रुव ताटे यांच्याविरुद्ध गुन्हा दाखल केला असून पुढील तपास सुरू आहे.
