जुन्नर: जुन्नर तालुक्यातील पिंपळवंडी येथे साडेनऊ वर्षांच्या मुलीचा मृत्यू झाल्याने परिसरात खळबळ उडाली आहे. आजारी असल्यामुळे मुलगी 18 ऑगस्ट रोजी शाळेत न जाता घरीच थांबली होती. तिचे आई-वडील नेहमीप्रमाणे शेतमजुरीसाठी बाहेर गेले होते. याच परिस्थितीचा फायदा घेत तिच्या ओळखीच्या एका तरुणाने तिला घरातून बाहेर नेल्याचा आरोप आहे.
मुलगी घरात एकटी असल्याचे लक्षात आल्यानंतर संबंधित तरुणाने तिला पेरू देण्याचे आमिष दाखवले. त्यानंतर तिला सोबत घेऊन गेल्याचे पोलिसांच्या तपासात समोर आले आहे. पुढे तिच्यावर लैंगिक अत्याचार करून तिची हत्या केली. घटनेमुळे पिंपळवंडी परिसरात संतापाचे वातावरण निर्माण झाले आहे.
दरम्यान, मुलगी बेपत्ता असल्याचे कुटुंबीयांना समजल्यानंतर गावातील नागरिकांनी तिचा शोध सुरू केला. पोलिसांनाही याबाबत माहिती देण्यात आली. शोधमोहीम सुरू असताना संशयित तरुणदेखील गावकऱ्यांसोबत मुलीचा शोध घेत होता. मात्र, पोलिसांनी परिसरातील CCTV फुटेज तपासल्यानंतर तपासाला वेगळे वळण मिळाले.
CCTVमध्ये एक तरुण सायकलवरून जाताना दिसून आला. त्यानंतर पोलिसांनी संबंधित व्यक्तीची चौकशी केली. त्याच्या बोलण्यात आणि हालचालींमध्ये विसंगती आढळल्याने पोलिसांचा संशय अधिक बळावला. पोलिसांच्या चौकशीत त्याने गुन्ह्याची कबुली दिल्याची माहिती समोर आली आहे.
रात्रभर शोध घेतल्यानंतर ओढ्याजवळील एका झाडाजवळ मुलीचा मृतदेह आढळून आला. या घटनेने कुटुंबीयांवर दुःखाचा डोंगर कोसळला असून गावात शोककळा पसरली आहे. ओळखीच्या व्यक्तीने विश्वासाचा गैरफायदा घेतल्याने नागरिकांमध्ये तीव्र संताप व्यक्त होत आहे. या प्रकरणाचा पुढील तपास पोलीस करत आहेत.
